सर्वाधिक आकर्षक महिला

१ करिश्मा मानन्धर'एउटी नायिकाले लामो समयसम्म आफ्नो छवि धान्न सक्छिन् भने उनी महान कलाकार हुन् ।' नायिकाको प्रसङ्गमा हलिउड निर्देशक स्टेफिन स्टिलवर्गले भनेको यो भनाइ नायिका करिश्मा मानन्धरमा पनि लागू हुन्छ । ४ दशक नाघे पनि करिश्मा कलकलाउँदी नायिकाको भूमिकामा फिट देखिन्छिन् । नवोदित नायक बाबु बोगटीको को-स्टारका रूपमा चलचित्र 'सायद' को अभिनयमा व्यस्त करिश्माले आफ्नो सौन्दर्य कसरी बचाएर राखेकी छिन भन्ने कुरा उनको व्यस्तताले प्रष्ट पार्छ । चलचित्र निमार् ता उद्धव पौडेलले साप्ताहिकसँग भने- '२० वर्षअघि मैले चलचित्र 'मायालु' मा जुन करिश्मा देखेको थिए, अहिले पनि त्यही करिश्मा देख्छु ।' उद्धवले भनेझैं करिश्माको करिम्याटिक जादु नेपाली ग्लामर उद्योगका निम्ति पहिलो स्थानमा छ । गत वर्ष साप्ताहिकको सर्वेक्षणमा आठौं स्थानमा रहेकी करिश्मा यो वर्ष पहिलो स्थानमा उक्लिएकी छिन् । २५ वर्षअघि चलचित्र 'सन्तान' मा करिश्मा जुन कुराका लागि छानिएकी थिइन्, आज पनि उनमा त्यही मोहनी छ ।
२ झरना बज्राचार्य गतवर्षको सर्वेक्षणमा दोस्रो स्थानमा रहेकी झरनाले त्यो स्थान यसपटक पनि गुम्न दिइनन् । सुहाउँदो कालो छाला, आकर्षक शारीरिक बनावट, नसालु आँखा तथा रगताम्य ओठकी धनी झरनाको व्यक्तित्वको प्रशंसा गर्नेहरू प्रशस्तै छन् । भिन्न किसिमको ग्ल्यामरस अनुहारका रूपमा झरनाको पर्दापण भएको हो । सन् १९९७ मा मिस वल्र्ड नेपालको उपाधि हात पारेर मोडलिङ, नेपाली रजतपट हुँदै बलिउडसम्मको यात्रा तय गरेकी झरना मिस वल्र्डमा प्रतिस्पर्धा गर्ने पहिलो नेपाली अनुहार थिइन् । प्रकाश सायमीद्वारा निर्देशित चलचित्र 'हतियार' बाट अभिनय यात्रा प्रारम्भ गरेकी झरनाले करिब ३ दर्जन चलचित्रमा काम गरिसकेकी छिन् । रोमान्टिकदेखि सेन्टिमेन्टल सबै प्रकारका म्युजिक भिडियोमा उनको राम्रो माग छ । उनी लक्स साबुन, टुपिएम चाउचाउ तथा मुना चियाजस्ता उत्पादनको ब्रान्ड एम्बेसडर पनि रहिसकेकी छिन् । ' झरनामा म भिन्नै प्रकारको व्यक्तित्व पाउँछु' निर्देशक भूषण दाहालले झरनाको नाम लिदै भने- 'उनी सुन्दर त छँदै छिन्, त्यतिकै बोल्ड र आत्मविश्वासी पनि दे खिन्छिन् ।' क्यामेरामा झरना जस्तो आकर्षक अरू नदेखिने भूषणको दाबी छ ।
३ माल्भिका सुब्बा
'स्मार्ट माल्भिकालाई उनको ड्रेस सेन्सले अझै उचाइमा पुर्‍याएको छ' नेपाल वानका भिजे सोनम पाखि्रनले माल्भिकाको परख गर्दै भने- 'वाकपटुताले पनि उनको सौन्दर्यलाई अझै बढाएको छ ।' सन् २००२ को मिस नेपाल उपाधि जित्न सफल माल्भिका सुब्बा नेपाली मिडिया पर्सनालिटीहरूमध्ये सबैभन्दा रुचाइएकी व्यक्तित्व हुन् । दर्जनौं म्युजिक भिडियोमा अभिनय गरेकी माल्भिका लामो समय कान्तिपुर टेलिभिजनमा भिजेका रूपमा कार्यरत रहिन् । मिलेको शारीरिक बनावटमा लोभलाग्दो मुस्कान छर्ने माल्भिका अहिलेसम्मका मिस नेपालहरूमा सबैभन्दा अग्रपंक्तिमा छिन् । 'माल्भिकामा एक प्रकारको अपिलिङ छ, जुन अरूमा छैन' गायक राजेश पायल राइले भनें- 'उनको पर्सनालिटी बोल्ड भएकाले कतिपय मानिस टाढैबाट उनको सौन्दर्यको परख गर्छन् ।' गतवर्ष साप्ताहिकको सर्वेक्षणका क्रममा नम्बर ६ मा रहेकी माल्भिका यसपटक ३ खुडि्कलो चढ्दै नम्बर ३ मा आइन् । 'माल्भिका मिस नेपाल भनेर घमण्ड साथ चिनाउन सकिने व्यक्तित्व हुन्' निर्देशक आलोक नेम्बाङले गत वर्ष नै भनेका थिए ।
४ सदीक्षा श्रेष्ठ'मिस नेपाल-२०१०' को शीर्ष उपाधि हात पारेपछि एकाएक सदीक्षा श्रेष्ठको व्यक्तित्व सार्वजनिक भएको हो । आकर्षक शारीरिक बनावटकी सदीक्षा १७ प्रतिस्पर्धीलाई उछिन्दै यो वर्ष मिस नेपाल भएकी हुन् । 'सदीक्षा सुन्दर छिन्, उनको चार्मिङ पर्सनालिटीलाई मेरो एक भोट' गायक निमा रुम्बाले भने- 'म उनको बौद्धिकताको पनि कदर गर्छु ।' मिस नेपालको मुकुटका अतिरिक्त मिस फोटोजेनिक, मिस पर्सनालिटी र मिस वाकको उपाधिसमेत जितेकी सदीक्षा यसअघि नै विज्ञापन दुनियाँमा आइसकेकी थिइन् । मिस ब्युटिफुल लेडी २००५ को उपाधि जितेर मोडलिङमा प्रवेश गरेकी सदीक्षा ५ वर्षपछि मुलुकको प्रतिनिधित्व गर्दै अन्तर्राष्ट्रिय प्रतिस्पर्धामा जान सक्ने भइन् । 'सदीक्षाको आँखामा एक प्रकारको आकर्षण छ ।' संगीतकार आलोकश्रीले भने- 'मलाई उनको हाँसो पनि उत्तिकै मनपर्छ ।' नेपाली ग्लामर उद्योगका निम्ति उनी संभावना भएकी पात्र हुन् । साप्ताहिकको सर्वेक्षणका क्रममा न्यू-कमरका रूपमा उनी चौथो स्थानमा परेकी छिन् ।
५ सहाना बज्राचार्य मिस नेपाल-२०१० मा उपाधिको हकदारका रूपमा धेरैले सहाना बज्राचार्यको नाम लिएका थिए । सौन्दर्यका दृष्टिकोणले सहानाले उपाधि जित्ने अनुमान थियो, तर उनी फस्ट रनर्सअप भइन् । सर्वेक्षणका क्रममा शिक्षाविद् विक्रम राई, टेलिभिजनकर्मी भूषण दाहाल, गायक निमा रुम्बा, हेयर स्टाइलिष्ट निल डेभिड कटवाल आदिले सहानाको सौन्दर्यको खुलेर प्रशंसा गरे । 'अन्तर्राष्ट्रिय स्तरको ब्युटि कन्टेस्टका लागि सहाना बज्राचार्यलाई जिताउनु आवश्यक थियो' शिक्षाविद् विक्रम राइले भने-'उनी साँच्चै नै सुन्दर छिन् ।' मिस अर्थ २०१० मा सहभागी भैसकेकी सहाना ब्रोडकास्टिङ मिडियाकी विद्यार्थी हुन् । मिडियामा रुचि राख्ने सहाना विभिन्न विज्ञापनमा समेत आइसकेकी छिन् । २० वर्षीया सहानाले इमेज च्यानलमा युगान्तर शीर्षकको कार्यक्रमसमेत सञ्चालन गरेकी छिन् । सहानाको उद्देश्य टेलिभिजनको माध्यमबाट नेपाली बालबालिका तथा महिलाहरूसम्बन्धी जनचेतना फैलाउनु हो । साप्ताहिकको सर्वेक्षणका क्रममा फस्ट रनर्सअप बज्राचार्य पहिलो पटकमै पाँचौं स्थानमा पर्न सफल भइन् । फोटोग्राफीमा समेत रुचि राख्ने सहानाको सौन्दर्यका बारेमा व्यवसायी सुमन शाक्यले भने- 'उनको अनुहारमा एकप्रकारको ग्ल्यामर र अपिलिङ झल्कन्छ ।'
६ नम्रता श्रेष्ठ सानो कद भए पनि नम्रताको लोभलाग्दो सौन्दर्य चर्चायोग्य छ । नम्रता साइबर संसारले गराएको फोटोसेसनबाट औपचारिक रूपमा मोडलिङ यात्रामा सामेल भएकी थिइन् । त्यसपछि म्युजिक भिडियोबाट उनको कला यात्रा प्रारम्भ भयो । आलोक नेम्बाङ निर्देशित 'सानो संसार' तथा सुदर्शन थापा निर्देशित 'मेरो एउटा साथी छ' मा नम्रताको सुन्दरतालाई नेपाली दर्शकले औधि मनपराए । सफा अनुहार, आकर्षक शारीरिक बनोट तथा मीठो मुस्कान नम्रताका सबल पक्ष हुन् । 'चलचित्रमा नम्रताको उपस्थितिले भिन्न पहिचान दिएको छ, उनको अभिनय शैली पनि उत्कृष्ट छ' व्यवसायी सुमन शाक्यले भने- 'उनी राम्री भएकाले जस्तो पहिरनमा पनि आकर्षक दे खिन्छिन् ।' नम्रताको सुन्दरताका बारेमा आधा दर्जन सहभागीले खुलेर प्रशंसा गरेका थिए । संगीतकार आलोकश्रीले समयलाई बुझ्ने, परिस्थितिको सामना गर्न सक्ने, आफ्नो महत्व बुझ्ने नारीका रूपमा लिँदै नम्रता आकर्षणको प्रतिमूर्ति भएको बताए । नम्रता गत वर्षको सर्वेक्षणमा नम्बर ५ मा थिइन् भने यो वर्ष एक खुडि्कलो तल झरेर नम्बर ६ मा पुगेकी छिन् ।
६ दिया मास्के
दिया मास्के पनि यो वर्ष पहिलो पटक आकर्षक महिलाको सूचीमा पर्न सफल भइन् । सर्वेक्षणमा छैटौं स्थानमा परेकी दियालाई नेपाली चलचित्र क्षेत्रमा संभावना बोकेकी नायिकाका रूपमा लिइन्छ । अनुप बराल निर्देशित दलनदेखि दर्जनौं नाटकमा उनले गरेको अभिनयको प्रशंसा भएको छ । दिया मास्केले चलचित्र कागबेनी तथा एक दिन एक रातमा मुख्य भूमिका निर्वाह गरेकी छिन् । १२ वर्षको उमेरदेखि नै कला क्षेत्रसँग जोडिएकी दियाले सानै उमेरमा नृत्य निर्देशक राजु शाहसँग 'ज्यानको माया नैना रे शम' शीर्षकको गीतका लागि चलचित्रमा नृत्यकला प्रस्तुत गरेकी थिइन् । कुशल नृत्यांगनाका रूपमा स्थापित दियालाई संगीतकार आलोकश्रीले पहिलो नम्बरमा भोट दिँदै भने- 'उनी सक्षम अभिनेत्री हुन्, अभिनय क्षमताका अतिरिक्त उनी ग्ल्यामरस पनि देखिन्छिन्, दियामा एकप्रकारको अपिलिङ पनि छ ।' दियालाई निमा रुम्बाले जस्तोसुकै भूमिकामा पनि फिट हुन सक्ने नायिकाको संज्ञा दिए ।

७ मृदुला खनाल
ग्लामरको दुनियाँबाट फरक समाचारवाचकको संसारबाट आकर्षक नारीका रूपमा उत्कृष्ट दसमा पर्न सफल मृदुला खनालको स्थान सातौंमा छ । मृदुलाको समाचारवाचनमा पनि एकप्रकारको आकर्षण झल्किएको सहभागीहरूले बताए । नेपाल टेलिभिजन टुमा समाचारवाचकका रूपमा परिचय बनाएकी मृदुलाले कान्तिपुर टे लिभिजनमा आएपछि थप चर्चामा पाइन् । गतवर्ष समाचारवाचकका रूपमा सिमि्रका शर्माले धेरै मत हासिल गरेकी थिइन् । मृदुलाको आवाज मीठो छ, त्यसमा पनि मृदुलाको क्युटनेसले धेरैलाई आकषिर्त गर्छ, आलोकश्रीको प्रतिक्रिया थियो । यस्तै नायक आर्यन सिंग्देलले मृदुलाको समाचारवाचनमा अपिलिङ झल्कने बताए । नायक सिग्देलले वास्तविक रूपमा नदेखेको भए पनि टेलिभिजनमा देखिने मृदुलामा आकषिर्त गर्न सक्ने खुबी पाएको उल्लेख गरे । सहभागीहरूले आकर्षक शारीरिक बनावटकी मृदुलाको आँखा, केश तथा अनुहारको प्रशंसा गरेका थिए ।
८ जेनिषा मोक्तान आकर्षक महिलाहरूको सूचीमा मिस नेपाल तथा पूर्वमिस नेपालहरूको उपस्थिति बाक्लो छ, भन्ने कुरा जेनिषाको उपस्थितिले पनि प्रष्ट पारेको छ । आकर्षक शारीरिक बनावटकी जेनिषा मोक्तान सुन्दर महिलामध्ये एक हुन् भनेर धेरै सहभागीले भोट दिएका थिए । उनको शरीर, हाँसो, आँखा तथा क्युटनेसको धेरैले प्रशंसा गरे । वर्ष २००९ को मिस नेपालको उपाधि जितेकी जेनिषा मोडलिङ, ग्लामर तथा अभिनयको क्षेत्रमा अघिदेखि नै सक्रिय थिइन् । मै ठूली भै छु रे गीतकि अभिनेत्री जेनिषालाई यो गीतले पनि चर्चाको चुलीमा पुर्‍याएको थियो, यसबाहेक उनले हास्य टेलिश्रृंखला 'घरपेटी बा' मा पनि अभिनय गरेर चर्चा कमाइन् । प्रशस्तै म्युजिक भिडियोमा अभिनय गरेकी जे निषा विज्ञापनको संसारमा पनि उत्तिकै छाएकी छिन् । 'जेनिषा ब्युटिफुल छिन्' गायक निमा रुम्बाले भने । त्यस्तै शिक्षाविद् विक्रम राइले अहिलेको पुस्ताका निम्ती जेनिषा सर्वाधिक आकर्षक सुन्दरी भएको बताए । जेनिषा सर्वेक्षणको क्रममा आठौं स्थानमा रहिन् ।
९ अञ्जु पन्त नेपाली पाश्र्वगायनमा सफल गायिकाका रूपमा परिचित छिन् । सबैभन्दा धेरै चलचित्रमा स्वर दिने महिला कलाकारका रूपमा स्थापित भैसकेकी अञ्जु सुगम संगीतमा पनि उत्तिकै लोकपि्रय छिन् । साहित्यकार कृष्ण धरावासीले आकर्षक महिलाहरूको सूचीमा अञ्जु पन्तलाई पनि रोजे । नयाँ पुस्ताका गायिकामा उनको स्वर र रूप आकर्षक पाएको धरावासीको भनाइ थियो । सर्वेक्षणका क्रममा धेरैले अञ्जु पन्तलाई क्युटको संज्ञा दिए । नबिर्से तिमीलाई नपाए तिमिलाई गीतकी यी गायिका आँखा, आवाज र भंगिमाका कारण आकर्षक महिलाको सूचीमा अटाउन सफल भइन् । मिठो स्वरका लागि मुम्बई धाउनुपर्ने बाध्यतालाई अञ्जु पन्तको आगमनले समाप्त पारेको चर्चित पाश्र्वगायक राजेश पायल राईको टिप्पणी थियो । अञ्जु सानो कदकी भए पनि आकर्षक शारीरिक बनावटकी धनी छिन् । उनी सौम्य छिन्, उनको अनुहार सबैलाई माया लाग्दो लाग्छ, सञ्चारकर्मी दिनेश डिसीले बताए । अञ्जु सर्वेक्षणमा नवौं स्थानमा पर्न सफल भएकि थिइन् ।
१० सपना मल्ल प्रधान गतवर्ष साप्ताहिकको सर्वेक्षणमा अत्यधिक मत पाएर नम्बर एकको स्थान पाएकी सभासद अधिवक्ता सपना मल्ल प्रधान यो वर्ष नम्बर १० स्थानमा पुगिन् । सपनाको व्यक्तित्व र सुन्दरताको बयान गर्नेहरू यो वर्ष पनि थुप्रै थिए, तर गतवर्ष भन्दा कम । सन् १९९० मा भारतवाट कानुनमा स्नातकोत्तर गरेर फर्किएकी सपनाको आकर्षक व्यक्तित्वको प्रशंसा गर्ने पनि प्रशस्त छन् । 'सपना मल्ल प्रधानसमग्र नेपाली महिलामै रोल मोडल हुन् ।' सञ्चारकर्मी दिनेश डिसीले भने- 'हल्का ब्ल्याक जाइन्ट स्ट्रक्चरले उनको व्यक्तित्वलाई उचाइ दिएको छ । 'उनी बोल्ड त छँदैछिन्, ब्युटिफुल पनि छिन्,' डिसीले थपे । एमालेका तर्फबाट सभासद सपनाले सन् १९९५ मा विचार मिलेका महिला वकिल तथा अभियानकर्ताहरूसँग मिलेर महिला कानुन र विकास मञ्चको स्थापना गरेकी थिइन् । गर्भपतनलाई कानुनी मान्यता दिलाएबापत अमेरिकाको मार्गेट सेनार पुरस्कारबाट सम्मानित सपनाले सन् २००८ मा लैंगिक समानताका लागि योगदान गरेवापत बहुचर्चित ग्रुबर अन्तर्राष्ट्रिय महिला पुरस्कार पनि पाइन् । शारीरिक सुन्दरताको रहस्य खोल्ने क्रममा सपनाले भनिन्- दैनिक जिम गर्छु, सातामा एकपटक स्वीमिङ गर्छु, सकारात्मक विचारलाई महत्त्व दिन्छु ।
१० ऋचा शर्मा ऋचा शर्मालाई नेपाली चलचित्र उद्योगमा आशालाग्दी नायिकाका रूपमा लिइन्छ । मिस नेपालकी समेत प्रतिस्पर्धी ऋचा आकर्षक शरीर भएकी नायिकाका रूपमा स्थापित हुने तरखरमा छिन् । सुहाउँदो कालो छाला, ठूला आँखा, कोठीको ग्लामर ऋचाका अन्य आकर्षण हुन् । 'ऋचा जस्तो सबै कुराले पूर्ण नायिका मैले अहिलेसम्म देखेको छैन' नायक आर्यन सिग्देलले भने- 'उनी कम्प्लीट नायिका हुन् ।' ऋचा अहिलेका नायिकाहरूमध्ये टिनएजरहरूले सबैभन्दा मनपराउने नायिकाका रूपमा ऋचा स्थापित भएको गायक राजेश पायल राइले बताए । आफूलाई नायिकाभन्दा पनि कुशल अभिनेत्रीका रूपमा चिनाउन चाहने ऋचाले अभिनय गरेको पछिल्लो चलचित्र 'फस्ट लभ' ले दर्शकको अत्यधिक माया पायो । ऋचा सर्वेक्षणका क्रममा सपना मल्ल प्रधानसँगै दसौं स्थानमा पर्न सफल भइन् ।

0 comments:

Post a Comment