नम्रताले पनि स्विकारिनन्

कृषा चौलागाईंको निर्माण र सबिर श्रेष्ठको निर्देशनमा ‘के म तिम्रो साथी बन्न सक्छु ?’ सिनेमाबाट विनिता बराल आउट भएपछि उनको साटो नम्रता श्रेष्ठलाई सिनेमाको लागि चुज गरिएको बताइएको थियो । तर नम्रताले पनि सो सिनेमा नखेल्ने घोषणा गरिन् ।‘यो सिनेमा खेल्न रिजेक्ट गर्नुभएको हो ?’ नम्रतालाई सोधिएको यो प्रश्नमा उनले, ‘रिजेक्ट भन्दा पनि उहाँहरुले यो सिनेमामा मलाई अफर गर्नुभएको थियो । मैले नखेल्ने जनाएकी हुँ ।’ भनिन् । ‘के म तिम्रो साथी बन्न सक्छु ?’ बाट डेब्यु गर्न लागेकी विनिता बराल स्क्यान्डलको कारण सिनेमा नखेल्नुभएको हो कि भन्ने प्रश्नमा नम्रताले ‘त्यस घटनाबारे केही थाहा छैन । मैले सिनेमा नखेल्ने मात्र भनेकी हुँ ’ भनिन् ।निर्मात्री कृषा चौलागाईंले बताएअनुसार नम्रताले पहिले खेलेको सिनेमा ‘मेरो एउटा साथी छ’सँग यो सिनेमा केही मेल खाने भएकाले यो सिनेमामा पनि नम्रता नै फिट हुने भनी उनले लास्ट आवरमा विनितालाई आउट गराइन् । अनि नम्रतालाई नै यो भूमिका सुट हुने बताएर उनैलाई छान्ने तयारी गर्दै थिइन् । तर नम्रता पनि कृषाको यो सिनेमामा नखेल्ने भएपछि चौलागाईं फेरि अप्ठ्यारोमा परिन् । अब उनले कुन नायिका छान्लिन् त्यो भने कौतुहुलको विषय भएको छ ।

Read More

समीक्षा : 'श्रीमान्'

चलचित्र :श्रीमान्
निर्देशक : नवल नेपाल
निर्माता : कल्याण घिमिरे
कथा : कल्याण घिमिरे
पटकथा,संवाद : नवल नेपाल,कल्याण घिमिरे
गीत : संजीवनी, प्रमोद ढुङ्गाना
संगीत : महेश खड्का

‘नपत्याउने खोलाले बगाउँछ’
नेपालीमा एउटा उखान छ, ‘नपत्याउने खोलाले बगाउँछ’,यस्तै भएको छ नेपाली चलचित्रमा । एउटा Low profile मा रहेको चलचित्रले दर्शकको रुपमा मलाई लगभग सवा दुइ घण्टा दर्शक सिटमा बाँधेर राख्न सक्यो, सफल भयो । धन्यवाद छ यो चलचित्रको परिकल्पना गर्ने र परिकल्पनालाई यथार्थ बनाउन सहकार्य गर्ने ती सर्जकहरुलाई जसले एउटा सुन्दर र गम्भिर कथा देखाउन मिहिनेत गरेका छन् ।एउटा नारी जो एक संघर्षरत केटासँग आत्मियताको बन्धनमा बाँधिएर प्रेमरुपी सुन्दर संसारको मुहानमा संसार सजाउँदै हुन्छिन् ।तर त्यो केटा करिअर महत्वकांक्षाका को आवेगमा हुत्तिन्छ । आफ्नो आत्मसम्मानको र आफ्नो पेटमा हुर्कंदै गरेको बच्चाको अधिकारको लागि कानुनी संघर्ष गर्ने शिलशिलामा दोस्रो पात्रसँगै भावनात्मक सम्बन्ध गाँसिन पुग्दछ र त्यो सम्बन्ध साँस्कृतिक श्रीमान,श्रीमतीको रुपमा परिणत हुन्छ । द्वन्द्वको सृजना तब गहिरिन्छ जब यो श्रीमानले रगतको सम्बन्धबीच भेदभाव राख्दछ अर्थात् आफ्नो रगत र पराइको रगत भनेर दुई बालिकाबीच भिन्नता राख्दछ र त्यसको उपजको रुपमा एक हृदयस्पर्षी परिस्थिति सृजना हुन्छ जहाँ सबैकुरा भताभुङ्ग हुन्छ । सुन्दर छ कथाको आधारभूत द्वन्द्व र हृदयस्पर्षी छ त्यसको उपज ।बालमनोविज्ञानसँग वयस्क मनोविज्ञानको द्वन्द्व वास्तवमै एक साहसी प्रयोग र प्रस्तुती हो जसले दर्शकको मनोविज्ञान र भावनालाई झक्झक्याउँछ र कथाको परिस्थिति सँग आफूलाई मूल्याकंन गर्न वाध्य गराउँछ । कथामा जे घट्छ त्यो स्वाभाविक छँदा छँदै पनि दर्शकको मनोविज्ञान पक्ष ,विपक्षमा द्वन्द्व गरिरहेको हुन्छ, जुन यो कथाको महत्वपूर्ण उपलब्धि हो ।यो चलचित्र नेपाली चलचित्रले व्यवसायिकताको नाउँमा बलिउड सिनेमाको कथाहरुको नक्कल गर्नुपर्छ भन्ने कमजोर मानसिकता बोकेका चलचित्रकर्मीहरुलाई सबक हुनेछ । कुनै पनि समस्यामा आधारित भएर कथा सृजना हुन सक्दछ र त्यसै समस्याको वरिपरि पटकथाको संरचना गर्न सकिन्छ । त्यसको लागि केवल चाहिन्छ सृजनसिलता र यो चलचित्रले त्यो पक्षलाई पुष्टि गरेको छ ।यस चलचित्रको कथा पक्ष सुन्दर रहेपनि पटकथा लेख्ने पक्षमा भने सर्जकले सृजनशिलताको अभिव्यक्ति गर्न सकेका छैनन् । पटकथा लेखनको कमजोरी संवादको माध्यमबाट ढाकछोप गर्न खोजिएको छ । त्यसकारण संवादको मात्रा आवश्यक भन्दा थोरै छ,पात्रहरुको चित्रणमा स्वाभाविकता झल्किंदैन र कतिपय परिस्थिति लादिएका छन् ।निर्देशकले शब्दरुपी पटकथालाई दृश्यरुपी चलचित्रमा रुपान्तरण गर्न पुरानै शैली अपनाएका छन् जो यस खालको भावअनुसार त्यति उपयुक्त बन्न सकेको छैन, देखिँदैन पनि ।विषयवस्तु र त्यसमाथि रचिएको कथामा जति मौलिकता र आधुनिकता भएपनि त्यसको प्रस्तुतीकरण शैलीमा अपनाइने पुरानै परम्परा यस चलचित्रको लागि हानीकारक बनेको छ, नत्र चलचित्रले उत्कृष्टताको उचाइ नाप्नेथियो । शैलीको आधुनिकी करणको अभावमा पात्रहरुको निर्माण र विकास तथा कलाकारहरुले त्यो पक्षलाई जीवन्तता दिने क्रममा गर्ने अभिनय एकदम अनुभवहीन र भड्कीलो भएको छ । चलचित्रमा बालकलाकारहरुको अभिनयमा जुन सहजता छ वयस्क कलाकारहरुको अभिनयमा सहजता भन्दा प्राविधिकता हावी भएको पाइन्छ । मुख्य पात्रको रुपमा रहेकी पुजना प्रधानले आफ्नो पात्रमा आत्मीयता भन्दा पनि प्राविधिक कलाकारको दृष्टिकोण बढी हावी गराएकी छन् जसको कारण उनले पाएकी जीवनको सबैभन्दा चुनौतिपूर्ण पात्रलाई जीवन्तता दिन चुकेकी छन् भने उनीसँगै दुई पुरुष पात्र अझ भनौं श्रीमान पात्रहरु ‘अभिनय, देखाउने कला हो’ भन्ने मान्यतामै रुमल्लिएका छन् । अभिनय जस्तै यस चलचित्रको प्राविधिक पक्ष पनि प्राविधिक मनोविज्ञान भित्र मात्रै जकडिएको छ ।चलचित्र निर्माण गर्ने शैली दुई किसिमले हुने विश्वब्यापी लहर छ । पहिलो, चल्दै आएको, बिक्दै आएको, कमाउँदै आएको समय र स्थान, जसलाई यही नै र यसरी नै गरिनुपर्दछ भन्ने स्थापित मूल्य मान्यता जसले एउटा संरचना र रुप ग्रहण गरिसकेको छ, जसलाई technicals (inbox) शैली भनिन्छ । र दोस्रो out of the box शैली, जहाँ सर्जकको नितान्त अवधारणा हुन्छ जसले विषयवस्तुलाई गहन ढङ्गले आत्मानुभूति गर्दै सृजनशील ढङ्गले प्रस्तुतीकरण गर्ने शैली निर्माण गर्छ ।यस चलचित्रको कथा चुन्ने शिलशिलामा भने out of the box शैली अपनाइएको छ । तर त्यसपछि पूर्ण रुपले प्राविधिक शैली नै अपनाइएको छ सायद चलचित्र निर्माणकर्ताहरुको rise taking गर्ने आँट नभएर होला । यो दृष्टिकोणको कमीले होला तर जे होस् यस चलचित्रले एउटा पक्षमा भएपनि आफ्नो छुट्टै अस्तित्वको झण्डा गाडेको छ र त्यसको लागि मात्र भएपनि यो चलचित्रको प्रशंसा गर्न जो कोही वाध्य हुन्छ ।अन्त्यमा चलचित्रको सबैभन्दा ठूलो star value भनेको यसको कथा हो र त्यसलाई पटकथा,संवादले साथ दिनु पर्दछ । यस अर्थमा चलचित्र ‘श्रीमान’ सँग ठूला नाम गरेका कलाकार, प्राविधिक नभएपनि एउटा बलियो स्टार छ कथाको रुपमा ।

Read More

बन्द सिद्धियो, अब रिलिज

गत वर्ष चलचित्र विकास बोर्डबाट ‘राष्ट्रिय फिल्म अवार्ड' पाउन सफल ‘छाडी गए पाप लाग्ला' शुक्रबार रिलिज हुने भएको छ। गत शुक्रबार नै रिलिजको पालो पाए पनि राजनीतिक अन्यौलका कारण प्रदर्शन मिति सारेको निर्माता केशव भट्टराईले बताए । ‘स्थिति नाजुक देख्दादेख्दै फिल्म चलाउन मन लागेन। अब त केही दिनलाई राजनीति गर्नेहरू पनि थाक्छन् कि,'काठमाडौंका १५ हलमा फिल्म चलाउने निश्चत गरेपछि उनले नागरिकसँग भने। विशेष फिल्मको कोटामा समेत परेको ‘छोडी गए पाप लाग्ला' सुशील पोखरेलको फिल्म‘जय शिब शंकर' पछि रिलिज गर्न निर्माता संघले निर्णय गरेको थियो।त्यसैले फिल्मले सन्तोषजनक व्यापार गर्न नसकिरहेको अवस्थामा पनि भट्टराई फिल्म चलाउन तम्सिएका छन्।‘स्थिति त राम्रो छैन। तर, राम्रो फिल्म चल्छ कि भन्ने आश बोकेर कम्मर कसेको हुँ,'उनले भने। उज्ज्वल घिमिरेद्वारा निर्देशित यो फिल्मले निर्देशनसहित सात विधामा अवार्ड पाएको थियो।फिल्मका कलाकार लाखापाखा लागेकाले प्रचार/प्रसारमा कठिनाइ भएको उनले गुनासो गरे। ‘बिराज भट्ट मुम्बई,ऋचा घिमिरे आफ्नै फिल्मको सुटिङमा, सञ्चिता मिडियामा त्यति आउन चाहँदिनन्। त्यसैले अलिक समस्या नै परेको छ,'भट्टराईले भने। तर, कलाकारलाई हल हलमा लैजाँदा व्यापार बढ्छ भन्नेमा चाहिँ उनलाई विश्वास छैन।‘फिल्मको गीत पहिलादेखि नै चर्चित छ। विभिन्न अवार्ड पाएको फिल्म हो। त्यसैले राम्रै होला भन्ने आश गरेको छु,' काठमाडौं बाहिरका हलहरूमा करिब डेढ वर्षअघि रिलिज भएको फिल्मका निर्माताले भने।

Read More

‘म आत्महत्या गर्न सक्छु !’

पहिलो गाँसमै ढुङ्गा पर्दा खानुपर्ने बाँकि खानाको बारेमा पिरोलिने जोकोही हुन्छ । त्यस्तै पीरमा परेकी छन् मोडल विनिता बराल । दर्जनौं म्यूजिक भिडियो र एडहरुमा दरो उपस्थिति जनाएकी विनितालाई निर्मात्री कृषा चौलागाईं र सविर श्रेष्ठले धोका दिएका छन् । एग्रिमेन्ट पेपरमा हस्ताक्षर भैसकेपछि विनितालाई यस्तो गरिनु उनीमाथिको ठाडो अन्याय हो ।‘के म तिम्रो साथी बन्न सक्छु ?’मा हिरोइनको रुपमा डेब्यू गर्न लागेकी विनितालाई सिनेमा युनिटले नराम्ररी धोका दिएपछि विनिता विक्षिप्त छन् । ‘म आत्महत्या पनि गर्न सक्छु !डाइरेक्टर सबिरको सिफारिसमा मलाई कृषाले निकालेकी हुन् । विनिता यसो भन्छिन् तर निर्देशक श्रेष्ठ भने यस्तो प्रतिकृया दिन्छन् मानौं यहाँ केही भएकै थिएन ।हामीले विनितालाई निकालेका हैनौं । उनको पर्सनल काम र स्टडीमा विजी हुन्छिन् जस्तो लागेर हिरोइन अर्को खोज्न थालेका हौँ’ श्रेष्ठको कुरामा सत्यताको कति प्रतिशत अशं छ त्यो उनैले जानुन, उनी भन्छन्, ‘तैपनि हिरोइन को राख्ने भन्नेमा छलफल गर्दै छौं ।’युनिटले नम्रता श्रेष्ठलाई हिरोइन राख्ने चर्चा छ । यसैगरी दिप्ती गिरी पनि हिरोइन छानिन सक्ने सम्भावना रहेको जनाउँछन् सविर ।सिनेमामा साइन गराएर सुटिङ थाल्ने बेलामा विनितालाई युनिटमा निकालिएको हो ।सुटिङ यही हप्ताबाट सुरु हुने पक्का पक्की थियो ।कृषाले कलाकारहरुसँग पहिलोपनि यस्तो व्यवहार देखाइसकेकी थिइन् । चलचित्र ‘कसम हजुरको’मा उनले विराजलाई आउट गरेर राजबल्लभलाई इन गराएकी थिइन् । अहिले घानमा विनिता परिन् ।आफूलाई सहयोग गर्न विनिताले मिडिया गुहारीरहेकी छन् ।नेपाली सिनेमामा सधैं देखिइरहने बासी अनुहारबाट दिक्दार भएका दर्शकलाई निर्माता निर्देशकको यस्तो व्यवहारले पिरोल्छ ।

Read More

समीक्षा : मेरो प्यारो माइतिघर

मेरो प्यारो माइतिघर
निर्देशक : उदय सुब्बा
निर्माता : सुरेन्द्र कुरुङबाङ, दिनेश पाख्रिन, कृष्णमणी कुइँकेल
संगीत : चेतन सापकोटा
सम्वाद : देव नेपाल
‘ताईं न तुइं हात लाग्यो दुई’
चलचित्रको समीक्षा गर्नु एकदम कठिन काम हो । विगत् तीन महिनादेखि चलचित्रको समीक्षा गर्ने जिम्मेवारी लिएपछि हरेक हप्ता प्रदर्शनमा आएका चलचित्रका राम्रा पक्षहरुको विषयमा प्रशंसा लेख्न पाए हुन्थ्यो भन्ने आकांक्षा सधैँ हुन्थ्यो । तर प्राय चलचित्र हेरेपछि निराशा मात्र हात पर्‍यो । केही चलचित्रका केही पक्षहरु सन्तोषजनक भएको अवस्थामा त्यस्ता पक्षहरुको सकेको प्रशंसा पनि लेखियो र त्यस्तो क्षण आफ्नो लागि पनि उल्लेखनीय रह्यो । चलचित्रका आधारभूत सिद्धान्त, शुत्र, शैली, अवधारणा र विश्वमा स्थापित मान्यताहरुको आधारमा हाम्रा चलचित्रहरुको विश्लेषण गर्दा पाठकहरुलाई समीक्षा पढ्दा ‘कति नराम्रो लेखेको’ भन्ने आक्रोश जाग्नु जायज हो र कतिपयले मेरो व्यक्तित्वमाथि पनि प्रश्न गरेका छन् त्यसलाई नकारात्मक नमानी नेपाली चलचित्र प्रतिको स्नेहको रुपमा हामीले लिएका छौँ ।म आफू पैसा तिरेर दुइ सवा दुइ घण्टा सामान्य दर्शकहरुसँग बसेर ती चलचित्र हेर्छु र वरिपरि रहेका दर्शकहरुको कुराकानी प्रतिपनि ध्यान दिन्छु । उनीहरुसँग चलचित्रको प्रतिकृया लिन्छु यसपछि बल्ल म चलचित्रलाई प्राविधिक र सृजनात्मक पक्षबाट मूल्याङ्कन गछु । तर हालसम्म प्राय चलचित्र हेरेपछि पिडा मात्र महसुस भएको छ र त्यही आधारमा समिक्षा बनेका छन् । समीक्षामा पिडाहरु पोखिएका हुन् । कसैप्रति कुनै आग्रह, पूर्वाग्रह नराखी चलचित्र हेरें र समीक्षा गर्न चलचित्र हेरेपछि दर्शकहरुको तत्कालको प्रतिकृयालाई मूल आधारको रुपमा लिने क्रममा यस हप्ता एक चलचित्र हेरेपछि रमाइलो प्रतिकृया पाएँ,‘ताइँ न तुइँ हात लाग्यो दुई ।’ यस हप्ता रिलिज चलचित्र ‘मेरो प्यारो माइतिघर’ हेरेपछि अरु दर्शकहरु र म पनि निराश भएँ ।यो चलचित्र एक युवतीसँग जोडिएर आउने विभिन्न घटना, दुर्घटनामा आधारित छ । एक धनी दाजुद्वारा एकदम माया पाएकी युवती जसलाई दाजुले पालेर खर्चको लागि भनेर बीसौं हजार दिन्छन्, गाउँको एउटा सोझो तर सौतिनी आमाको षड्यन्त्र जालमा फँसिरहेको केटोसँग प्रेमविवाह गर्न पुग्छीन् र त्यसपछि सौतेनी सासुको षड्यन्त्रको र हेपाहा प्रवृत्तिको चङ्गुलमा फँस्छिन् । तर जब सौतीनी आमाले सम्पत्तिको लागि गरिरहेको षड्यन्त्र थाहा पाउँछन् त्यसको विद्रोह गरेर केटी आफ्नो श्रीमानलाई उपचार गराउन सहर आउँछे र शहरमा पनि समस्याका अपहरणमा फस्छिन् अनि त्यसबेला दाईको विरताले सबै समस्या समाधान गरेर खुसी हाँसिल गर्छिन् त्यसैले चलचित्रको नाम ‘मेरो प्यारो माइतिघर’ राखिएको हो भनेर अर्थ लाउन सकिन्छ ।कथाको सृजना केही बलिउडका चलचित्रको मिश्रित स्वरुपमा छन् र पटकथा बनिबनाउ र बासी हुन् । एक पछि अर्को घटना घट्छ भनेर सहज रुपमा भन्न सकिने हुँदा चलचित्र चल्ने अवधिभर मन थामेर बस्न अत्यन्तै कठिन हुन्छ । पटकथालाई फेरि त्यस्तै बनिबनाउ र बासी संवादले त झन् कमजोर बनाएको छ । त्यसकारण चलचित्रको लेखोट,(कथात्मक पक्ष) मृत अवस्थामा छ । अब यस्तो पटकथा संवादमा कलाकारहरुले के नै गर्न सक्छन् ? सबैजना पात्र हैन कलाकार मात्रै देखिन्छन् चलचित्र भरि । राजेश हमाल, त यति प्राविधिक(Mechanical)प्रस्तुत हुन्छन् कि उनमा कुनै भावना झल्किँदैन र उनलाई पात्रको संवेदनासँग कुनै सरोकार नै छैन । उनी उभिदिन्छन् र बोल्न पर्ने संवाद बोल्छन्, हिँड्नु पर्दा हिँड्छन् र हिर्काउनु पर्दा हिर्काउँछन् ।दृश्यहरु ‘छाप्न’ को लागि छापिएका छन्, सम्पादनमा काट्ने र जोड्ने मात्र भएको छ, पाश्र्व संगीतमा वाजा बजाउनुकालागि बाजा बजाइएको छ । र यसरी बनाउन मात्रैकालागि बनाइएको चलचित्र हो ‘मेरो प्यारो माइतिघर’ जसले दर्शकलाई बनिबनाउ मनोरंजन पस्कन्छ ।यहाँ एउटा प्रचलन छ, ‘आर्ट चलचित्र र कमर्शियल चलचित्र’ भनेर छुट्याउने । आर्ट हुन दर्शकलाई मनोरन्जन नै गराउन हुन्न भन्ने र कमर्शियल हुन दर्शकलाई बनिबनाउ मनोरंजन जबर्जस्ति पस्किनपर्ने । यो चलचित्र कमसेकम कमर्शियलको नाउमा जबरजस्ति मनोरंजन ठोस्न खोजिएको विकृत मानसिकताको उपज चलचित्र हो । यस्ता चलचित्रहरु बजारमा थुप्रै आएका छन्, आउँदैछन् र आउनेछन् तर यो चलचित्र नेपाली चलचित्र इतिहासमा कहिँ पनि नाम दर्ता गराउन सक्दैन र भिडमा हराउँछ । व्यावसायिक चलचित्र बनाउने नाउँमा यसरी बासी मनोरंजनको व्यापार मात्र गर्न खोज्दा नेपाली चलचित्रमा समस्या स्थापित भएको हो । चलचित्रको मुख्य उद्देश्य नै मनोरंजन हो । विश्व व्यापारमा चलचित्रलाई मनोरंजनको साधन र साद्य मानिन्छ । मानिसलाई स्वस्थ खाना, सफा लुगा, स्वस्थ हावा पानीको आवश्यकता परेझैँ स्वस्थ मनोरंजनको अत्यन्तै आवश्यकता पर्दछ । त्यसैकारण हामी मनोरंजनको व्यापारलाई कमजोर नठानी गर्वसाथ सार्थक, विश्वसनीय र सृजनशील मनोरंजनको व्यापार गर्न सक्छौँ । जब यो दृष्टिकोणको विकास सबै चलचित्रकर्मीसँग हुन्छ तब नेपाली चलचित्र उद्योगको व्यवस्थित, विकास हुन्छ र छलाङ मार्ने छ ।हरेक चलचित्रको आआफ्नो विशेषता हुन्छ र त्यही विशेषताको कारण दर्शकहरु चलचित्र हेर्न हलसम्म पस्छन् । मिडियाले चर्चा गर्छन् दर्शकहरु चलचित्र अवधिभर त्यसको प्रस्तुतीकरण शैली र क्षमताबाट बाँधिएर बस्छन् । एक विशेष रचनात्मक र सृजनात्मक अनुभूति लिएर फर्कन्छन् । त्यसकारण त्यो चलचित्रको महत्व स्थापित हुन्छ तर जब कुनै चलचित्रसँगै आफ्नो विशेषता रहँदैन तब त्यो चलचित्र पोस्टर र रिलमा बन्दी भएको एक एक निर्जिव कथा मात्र भएर मर्छ । कुनै पनि चलचित्र समीक्षा कथा भएर दर्शकहरुको मनमष्तिकमा जीवित भैरहन पाउनु त्यो चलचित्रको लागि सम्पूण अहोभाग्य र त्यसका सर्जकहरुलाई गौरबको विषय हो । यस्तो अहोभाग्य ‘मेरो प्यारो माइतिघर’ले कदापी पाउने छैन ।

Read More

‘गर्लफ्रेन्ड’का पतिले कुटे भुवनलाई बीच सडकमै

सुस्मितासँगको सम्बन्धबिच्छेदपछि शर्मिला डंगोल नामकी एक बिबाहित युवतीलाई आफ्नी नयाँ प्रेमिका भनेर चिनाउँदै आएका भुवन केसीलाई तीनै प्रेमिकाका श्रीमानले बिच सडकमै भकुरेका छन् ।पर्दामा हिरो बनेर सधैं गुण्डालाई पिटिरहने र सधैजसो जितिरहने भुवन केसीले सनिवार दिउँसो भने बिच सडकमै कुटाइ खानुपर्‍यो त्यो पनि फिल्मी शैलीमै । प्रत्यक्षदर्शीका अनुसार भुवनलाई शर्मिलाका पतिले पैसाको लोभमा आफ्नी श्रीमतीलाई बरालेको भन्दै सनिवार मध्यान्ह करिव पौने १२ बजे कोटेश्वर चोकमा गाडीबाट थुतेर कुटेका थिए ।भुवन र शर्मिला गाडीमा कोटेश्वरबाट भक्तपुरतिर गइरहेका थिए । गाडी शर्मिलाले हाँकिरहेकी थिइन भने भुवन फ्रन्ट सिटमा थिए । तर उनीहरुको गाडीलाई एउटा मोटरसाइकलले पिछा गरिरहेको थियो । गाडी नजिकै पुगेपछि मोटरसाइकलमा सवार पुरुषले चिच्चाउँदै गाडी रोक्न भने । तर शर्मिलाले गाडी रोक्न मानिनन् । अन्ततः ती पुरुषले गाडीलाई ओभरटेक गरे र अगाडी लगेर मोटरसाइकल तेर्साए । अब भने शर्मिलाले गाडी नरोकि सुखै भएन् ।
मोटरसाइकलबाट ओर्लिएपछि ती पुरुषले हेल्मेट निकालेर गाडीको सिसा फोर्न खोजे । त्यसपछि भुवनले गाडीको सिसा खोले । सिसा खोलेपछि शर्मिलाका पतिले भुवनको कपाल भुत्लाउँदै हेल्मेटले उनको टाउकोमा हानिरहे । गर्लफ्र्रेन्डका पतिले यसरी तथानाम नाम गाली गदर्ैै मुक्का हानिरहँदा पनि भुवन सामान्य प्रतिकार गर्नेबाहेक अरु केही गर्न सकेनन् । यतिबेलासम्म त्यहाँ भीड जम्मा भइसकेको थियो । भुवनले भने यो बेफकुफ हो, यो पागल हो भन्दै कराईरहेका थिए । डंगोलले भने आफ्नो सम्पत्ति हडप्न श्रीमतिको पछि लागेको भन्दै अश्लिल गाली गरिरहेका थिए ।त्यही शर्मिलाका पतिले शर्मिलालाई समेत दुई चार झापु दिइसकेका थिए । करिव १५ मिनेटको द्वन्द्वपछि भुवन त्यहाँबाट कोटेश्वर चोकतिर भागे । शर्मिलाले हाँकिरहेको गाडी डंगोल दम्पतीकै रहेछ । घटनाका प्रत्यक्षदर्शी बालकोट निवासी राजन ढुंगानाका अनुसार त्यसपछि डंगोलले हातमा हेलमेट लिएर पहिले भुवन बसेकै सिटमा बसे । डंगोलले पत्नीलाई सम्झाउन खोजेपनि शर्मिला भने होस उडेको अबस्थामा थिइन, उनी केही पनि सम्झन सक्ने अबस्थामा थिइनन् ।उनी भागिसकेपछि प्रहरी पनि त्यहाँ पुग्यो । सुरुमा त दुर्घटना भएर भिडभाड भएको हो कि भनेर प्रहरी अलमलियो पनि । पछि डंगोल दम्पती र गाडीलाई कोटेश्वरस्थित ट्राफिक प्रहरी कार्यालय पुर्‍याइयो । शर्मिलाको लाइसेन्सबाट उनीहरु पतिपत्नी रहेको प्रमाणित भएपछि प्रहरीले छाडिदिएको थियो ।महानगरिय ट्राफिक प्रहरी प्रभाग कोटेश्वरका प्रहरी निरिक्षक प्रेमराज जोशीले भने सामान्य पति-पत्नीको झगडा भएकाले छाडिएको बताउनुभयो । प्रहरी पुग्दा कुटाइ खाने ब्यक्ति भागिसकेको र डंगोल दम्पतीले पछि मान्छे पठाएर गाडी फिर्ता लगेको जोशीले जानकारी दिनुभयो । भुवन केसी भने यो घटनापछि मिडियाको सम्पर्कमा आएका छैनन् ।शर्मिलाका दुई छोरी र श्रीमान छन् । केही दिनअघि ललितपुर प्रहरीको रोहवरमा भएको छलफलमा शर्मिला र उनका पतिवीच सम्बन्ध बिच्छेद गर्ने सम्पत्ति अंशबण्डा गर्ने सहमति भएको थियो । डंगोलको अधिकांश सम्पत्ति पत्नी शर्मिलाकै नाममा भएकाले प्रहरीले उनका बैंक खाता रोक्का गर्ने प्रकृया समेत थालेको छ ।

Read More

सहरै कुरूप पार्ने फिल्म पोस्टर

गत साता भारतीय अभिनेता नसिरुद्दिन साह काठमाडौं आउँदा यहाँका भित्ता नेपाली फिल्म ‘दशगजा' र ‘म बिर्सुं कसरी'का पोस्टरले ढाकिएका थिए। छिटफुट भित्तामा ‘निगरानी'का पोस्टर पनि थिए। भारतीय सिनेमाका यी प्रतिभाशाली अभिनेताले मुम्बई फर्किने बेला नागरिकसँग अन्तर्वार्तामा भने, ‘पोस्टर हेरेरै थाहा हुन्छ, नेपाली फिल्म कस्ता बनिरहेका छन्।' उनले भने- ‘थोत्रा बलिउड फर्मुला हेरेर फ्यान्टासीमा रमाए नेपाली सिनेमाले ध्वस्त हुने बाटो समातेको ठहरिनेछ।'नेपाली सिनेमाका पोस्टरमा दुई दशकदेखि छाउँदै आएका अभिनेता राजेश हमाललाई साहको भनाइ अस्वाभाविक लाग्दैन। ‘जस्तो फिल्म बनाउँदा उद्योगले निरन्तरता पाउँछ, हामीकहाँ त्यस्तै फिल्म बनिरहेका छन्,' हमाल भन्छन्, ‘साह आर्ट फिल्मका मान्छे भएकाले मूलधारका सिनेमाको आलोचना गर्नु अस्वाभाविक होइन।'
कस्ता छन् नेपाली फिल्मका पोस्टर जसबाट साहले नेपाली फिल्मको गुणस्तर थाहा पाए?
निर्देशक रमेश बुढाथोकी पोस्टरबाटै नेपाली सिनेमा बलिउडबाट प्रभावित भएको प्रस्टै देखिने बताउँछन्। अघिल्लो वर्ष बनेका ७५ फिल्ममध्ये ६ वटाले दुःखजिलोसँग लगानी उठाएको उद्योगमा ‘अधिकांश फिल्मले थोत्रा बलिउड फिल्मलाई नै आदर्श मानेको' उनको अनुभव छ।हिरोको एक्सन र हिरोइनको भद्दा पोजले प्राथमिकता पाउने पोस्टरले सिनेमाको गुणस्तरमात्र उजागर गर्ने होइन, सहर नै कुरूप पारिरहेको उनको चिन्ता छ। निर्माता कर्ण शाक्यको सोचबाट प्रभावित भएर सार्वजनिक ठाउँमा पोस्टर नटाँस्ने घोषणा गरिएको फिल्म ‘पल' का निर्देशक बुढाथोकी भन्छन्, ‘अब बनाउने फिल्मको पोस्टर पनि जथाभावी टाँस्दिनँ, सहर कुरूप नपार्न निर्मातालाई कन्भिन्स गर्छु।'फिल्म चलेको सूचना पोस्टरले दिए पनि दर्शक तान्न राम्रै फिल्म चाहिने उनले बुझेका छन्। फिल्मकर्मीले सभ्य नागरिकको परिचय दिनुपर्ने खाँचो औंल्याउँदै उनी भन्छन्, ‘पोस्टर डिजाइनमा वितरकको दबदबा छ तर निर्देशकले राम्रा पोस्टर बनाउन हस्तक्षेपकारी भूमिका खेल्नुपर्छ।'
निर्देशक दयाराम दाहाल भने भारतमा बन्ने भोजपुरी र कयौं हिन्दी फिल्मभन्दा नेपाली फिल्मको पोस्टर डिजाइन राम्रो भएको दाबी गर्छन्। साह काठमाडौं छँदा यहाँका भित्तामा दाहालको सिनेमा ‘दशगजा'का पोस्टर टाँसिएका थिए। उनले भने, ‘हामीले दर्शक रुचिकै आधारमा पोस्टर बनाउँछौं।' उनी यथार्थपरक फिल्म बनाउन बजेटले साथ नदिने बताउँछन्।
भारतमा मौलिक फिल्म बनाउन चाहनेलाई सरकारले अनुदान दिने उल्लेख गर्दै नेपालमा भने चलचित्र विकास बोर्डको १२ वर्ष नै १२ थरी कार्यकर्ता भर्ती गरेर बितेको उनको दाबी छ। यति भन्दाभन्दै नेपाली सिनेमाका पोस्टर गतिला नहुने उनी स्विकार्छन्, ‘मैले गरेको डिजाइन वितरकले फेर्दिन्छ, उनीहरूले नचाहेसम्म नयाँ गर्छु भन्नेलाई सजिलो छैन।'अर्का निर्देशक राजेन्द्र उप्रेती पोस्टरमा बलिउडको प्रभाव आवश्यकै देख्छन्। ‘उता जस्ता फिल्म चल्छन्, यता पनि त्यस्तै चल्छन्,बलिउडका पोस्टर रुचाएको देखेपछि हामी त्यस्तै बनाउँछौं,' उनी भन्छन्।काठमाडौंमा आफ्नो निर्देशनको ‘निगरानी' रिलिज हुँदा‘कसलाई अफ्नो भनुँ'को सुटिङमा व्यस्त उप्रेतीले दर्शककै चाहनालाई ध्यान दिएर ‘एक्सन प्रभावी' पोस्टर बनाएको अड्डी लिए। ‘कलाकारले ड्रेसमा ध्यान नदिएर अलि समस्या छ, पछि फोटो सेसन गरेर पोस्टर बनाउन पाए राम्रो हुन्थ्यो,' उनी भन्छन्।
पोस्टरले दर्शक भड्काएको उनी मान्दैनन्। ‘नयाँ कलाकार र हलको लापरबाहीले व्यापार घटेको हो, पोस्टरले होइन,' उनको विश्वास छ।अधिकांश नेपाली फिल्मका पोस्टर कलाकार सुन्दर श्रेष्ठको ‘आइडियल डिजाइन'मा बन्छन्। उनका अनुभवमा ‘चल्ने कलाकारको टाउको पोस्टरबाट बेच्नुपर्ने' अवस्था छ। करिअरको सुरुआतमै बनाएको ‘तृष्णा' फिल्मको पोस्टरले निर्देशक उगेन छोपेललाई प्रभावित पारे पनि त्यस्ता ‘कलात्मक' पोस्टरलाई उनले निरन्तरता दिन सकेनन्। ‘त्यो पोस्टर बनाएपछि मलाई उगेनले मुम्बई बोलाएका थिए, तर यहाँको कामले जान सकिनँ,' उनी भन्छन्।निर्मातालाई १० विकल्प दिने र उनीहरूले छानेको डिजाइनलाई अन्तिम रूप दिने काममै उनको व्यवसाय चलेको छ, ‘हामी आफ्नो कलाकारिता देखाउने भन्दा पनि निर्माता बचाउने काम गर्छौं।'यति हुँदाहुँदै पछिल्लो सिनेमा ‘ब्याच नं. १६'पोस्टरकै कारण चर्चित बन्यो। प्रचार सामग्रीकै नवीनताले फिल्म दर्शक आकर्षित गर्न सफल भयो जबकी विषयवस्तु र प्रस्तुतीकरण औसत फिल्मभन्दा माथि थिएन। मौलिक नेपाली सिनेमा ‘प्रेमपिण्ड' बनाएको जस पाएका निर्देशक यादव खरेलको मूल्यांकन छ, ‘अधिकांश नेपाली फिल्मले छान्ने यौन र हिंसाकै विषय पोस्टरमा प्रतिविम्बित हुन्छ।' ‘फिल्मको बल जेमा छ, प्रचार सामग्रीमा त्यही राख्ने हो, फिल्म नै सस्तो विषयमा घुमेको छ भने गहकिलो चिज के देखाउनु?' उनी भन्छन्।फिल्मका टेलिभिजन विज्ञापन अझै कमसल हुने उनको टिप्पणी छ, ‘मेरो फिल्ममा नायिकाको चीरहरण गरिएको छ, हिरोले यति फन्का घुमेर लात्ती हान्छ, हेर्न आउनुस् भन्नेजस्ता विज्ञापन आउँछन्।'फिचर फिल्म बनाउँदै गरेका नेपाली निर्देशकभन्दा डकुमेन्ट्री र छोटो फिल्म बनाइरहेका नयाँ पुस्तामा उनले सम्भावना देखेका छन्,‘विषयको अब्बल रोजाइ र प्रयोगपरक प्रस्तुति उनीहरूको फिल्ममा देखिन्छ, यो पुस्ताबाट आशावादी छु।'

Read More

'पल'ले प्रीमिएर र च्यारिटि सो गर्ने

चर्चित लेखक कर्ण शाक्यको चलचित्र 'पल'ले रिलिज हुने केही महिना अघि नै प्रीमिएर सो र च्यारिटि सो गर्ने भएको छ । रमेश बुढाथोकीले निर्देशन गरेको सिनेमाका प्रोजेक्ट म्यानेजर सुवास काफ्लेले मेरोसिनेमालाई बतएअनुसार 'पल'ले चलचित्र विकास बोर्डबाट विशेष सिनेमाको सम्मान पाएको छ ।चलचित्र रिलिज हुन दुई महिना नै बाँकि हुँदा प्रीमिएर सो र च्यारिटी सो किन गर्न लागेको ? यस प्रश्नको उत्तरमा काफ्लेले 'पल' टिमको पैसा कमाउने कुनै उद्देश्य छैन । त्यसैले हामीले च्यारिटी सो र प्रीमिएर सो को लागि फोकस गरेका हौँ ।' भन्नुभयो । जेठको तीन गते सिनेमाको प्रीमिएर सो गरिने बताइएको छ ।यसबारे जानकारी गराउने उद्देश्यसाथ भोलि प्रेस मिटको कार्यक्रम राखिएको छ । 'देशैभरि ११ जेठबाट साउनको अन्तिमसम्म च्यारिटी सो को आयोजना गर्दैछौं ।'काफ्ले भन्नुहुन्छ । नेपालबाहेक विदेशका चारवटा मुलुकमा पनि प्रीमिएर सो आयोजना गर्ने बताइएको छ । सिनेमामा राजबल्लभ कोइराला, अनुप बराल, करिष्मा मानन्धरलगायतका कलाकारहरुको अभिनय रहेको छ ।

Read More

रजतपटमा सम्बन्ध जोड्ने र तोड्नेको लहर

अहिले रजतपटमा सम्बन्ध जोड्ने र तोड्नेको लहर नै चलेको छ । केहि सेलिब्रेटीले बिबाह गरेका छन् भने केहिले सम्बन्ध बिच्छेद गरेका छन् । बिबाह र सम्बन्ध बिच्छेदका समाचारहरूले अहिले सञ्चारमाध्यममा निकै स्थान पनि पाएको छ ।भर्खरै मात्र गायकबाट नायक बनेका प्रशान्त तामाङले गीता थापा मगरसँग प्रेम सम्बन्ध स्थापित गरेर बिबाह गरे । गोर्खापल्टन, अंगालो यो मायाको जस्ता चलचित्रमा अभिनय गरेका प्रशान्तले शनिबार दार्जिलिङस्थित एक पाँचतारे होटलमा भव्य समारोहका बिच बिबाह सम्पन्न गरेका हुन् । त्यस्तै सुरज चन्दसँग सम्बन्ध विच्छेद भएर एक्लै बस्दै आएकी नायिका पूजा चन्दले पनि दोस्रो बिबाह गर्दैछिन् । हाल अमेरिकामा बस्दै आएकी पूजाले शुक्रबार द एन्जेल्स ब्यान्डका गायक तथा मुख्य गिटारिस्ट राजु लामासँग इङ्गेजमेन्ट गरिन् । उनीहरूको बिबाह आगामी अगस्ट महिनामा हुने भएको छ ।यता महानायक राजेश हमालले पनि आफूले छिट्टै नै बिबाह गर्ने बताएका छन् । केहि बर्ष देखि एक युवतीलाई प्रेम गरिरहेका हमालले तिनै युवतीसँग सन् २०१२ भित्रमा बिहे गर्ने बताएका छन् । यस्तै सदावहार नायक भुवन केसी पनि सुस्मिता केसीसँग सम्बन्ध बिच्छेद गरेपछि तेस्रो बिबाहको तयारीमा छन् । उनले केहि दिन अगाडी शर्मिला डंगोल नाम गरेकी एक युवतीलाई आफ्नो गर्लफ्रेन्ड भन्दै चिनाएका थिए र उनीसँग आफ्नो तेस्रो बिबाह पनि हुनसक्ने बताएका थिए । यो खबरसँगै भुवनकी पूर्वपत्नी सुस्मिताले पनि आफूले बिबाह गर्ने सक्ने बताएकी छिन् ।यसरी सम्बन्ध स्थापित गर्ने क्रममा नायिका सोभिता सिंखडा पनि परेकी छिन् । लामो समयदेखिको प्रेम सम्बन्धलाई मूर्तरूप दिंदै सोभिताले बुधबार काठमाडौं जिल्ला प्रशासन कार्यालयमा आफ्ना प्रेमी निराजन भण्डारीसँग कोर्ट म्यारिज गरिन् । सानैदेखि कोर्ट म्यारिजको रहर भएकोले उनले कोर्ट म्यारिज गरेकी हुन् । उनका श्रीमान् सञ्चारकर्मी हुन् जो अहिले कतारमा बस्दै आएका छन् । यसैगरी नृत्यनिर्देशक दिनेश अधिकारीले पनि केहि समय अगाडी पुष्पा निरौलासँग मागी बिबाह गरेका छन् ।स्वच्छ छविकी नायिका भनेर चिनिएकी तृप्ती नाडखरले पनि दोस्रो बिबाह गरेपछि त झन् यो प्रसङले निकै स्थान पाएको छ । उनले केहि समय अगाडी भोजपुरी नायक राहुल सिन्हासँग बिबाह गरेपछि चलचित्रकर्मी मात्र हैन उनका प्रशंसकहरू पनि छक्क परेका छन् । यो उमेरमा आएर तृप्तीको बिहे ? यता नायक निखिल उप्रेतीले आफ्नी श्रीमती कोपिला उप्रेतीलाई लत्याएर नायिका सञ्चिता लुईटेललाई काखी च्यापे पछि पनि रजतपट निकै हल्लिएको थियो । त्यसैमाथि सञ्चिता गर्भवती भएको खबर आउँदा त झन् यसले चलचित्रकर्मीलाई मात्र नभएर उनका फ्यानहरूलाई पनि मज्जाले तताएको छ ।गायिका अञ्जु पन्त र गायक मनोज राजको बैबाहिक सम्बन्धको चर्चा अहिले सर्वाधिक अगाडी रहेको छ । कानुनत: रूपमा पारपाचुके गरिनसकेको भए पनि अञ्जु र मनोजको सम्बन्ध लगभग छुट्टिए जस्तै नै छ । स्वरका धनी अञ्जु र मनोजलाई बिभिन्न कार्यक्रममा एकसाथ देखिए पनि यिनीहरूको बोलचाल भने हुने गरेको छैन । अञ्जु त अब मनोजको नजिक पनि पर्न नचाहेको बुझिएको छ भने मनोज अझै अञ्जुसँग सम्बन्ध नबिग्रोस् भन्ने चाहेको बुझ्नमा आएको छ । तर त्यो लगभग असम्भव जस्तै छ । करिब एक वर्षअगाडि मात्र विवाह गरेकी बलिउड अभिनेत्री मनिषा कोइरालाको पनि वैवाहिक जीवन भनेजस्तो सुमधुर छैन।सम्बन्ध जोडीनु त राम्रो कुरा हो तर सम्बन्ध किन बिग्रिन्छन् ? बिशेष गरी सेलिब्रेटीको सम्बन्ध सम्प्रनु भन्दा पनि बढि बिग्रिएको पाईन्छ । आखिरमा किन ? यो प्रश्नको उत्तर सधैं नै खोजि भईरहेको छ र भईरहने पनि छ ।

Read More

दोस्रो पुस्ता हावि हुँदै

केहिवर्ष अगाडिका खुब नाम चलेका अभिनेता तथा अभिनेतृहरु अहिले विस्तारै हराउन थालेका छन् । उनीहरुको ठाउँ नयाँ, चकलेटी र फिल्मको गहिरो अध्ययन गरि आएका अनुहारले प्रतिस्थापन गर्दै छ । अहिले पुरानामाथि नयाँ हावि हुने कारण यस्तो छ : कोही बलिउडमा हाम फाल्ने सोंचकासाथ हिँडे भने कोही पारिवारिक कारणले । एक्सन हिरोको रुपमा स्थापित विराज भट्ट र निखिल उप्रेती नेपाली सिने उद्योगलाई टाटा-बाइबाइ गर्ने सुरमा छन् । यसैगरी उषा पौडेल, निरुता, झरना र निखिल पत्नी संचिता जस्ता अभिनेतृहरु पनि पलायन हुँदै छन् । तर पुराना राजेश हमालको क्रेज भने कहिँ कतै पनि कम भएको महशुस भएको छैन ।विराज र निखिललाई राजबल्लभ, कर्मा, आर्यन, जस्ता अभिनेताहरुले प्रतिस्थापन गर्दै छन् निरुता, संचिता, झरना र उषालाई केकी, बेनिशा नम्रता, माल्भिका जस्ताले प्रतिस्थापन गर्दै छन् ।विराज भट्ट विशेष गरि पारिश्रमिकको कारण भोजपुरी फिल्मतिर आकर्षित हुँदै छन् । 'हिम्मत२''न बिर्सें तिमीलाई न पाएँ तिमीलाई' 'तिमीबिनाको जीवन''चिनो' लगायतका उनका फिल्महरु फ्लप भए । हो पनि 'म विस्थापित हुने पो हो कि !' भन्ने डरले उनलाई सतायो होला ।
निखिल उप्रेती पनि यही बाटो हिँड्दै छन् । संचितासँग विवाह गरेर मुम्बइ छिरेका निखिल अनेक वहाना बनाएर नेपाली सिनेमा नखेल्ने सुरमा छन् । उनी कहिले उच्च पारिश्रमिक माग गरेर त कहिले 'फुर्सद छैन' भनेर टाढिँदै छन् ।
निखिलको 'दशगजा' र 'जयशिव शंकर' आउँदो शुक्रबार रिलिज हुँदैछ भने विराजअभिनित 'विरताको चिनो', 'जयशिव शंकर' सिनेमा पनि सोही दिन रिलिज हुँदै छन् । थोरै सिनेमा बन्ने उद्योगमा धेरै सिनेमा एकैदिन रिलिज हुँदा दर्शक बाँडिने कारण निर्मातालाई पनि आर्थिक रुपमा धेरै फाइदा नहुने निश्चित छ ।'चोक्टा खान गएकी बुढी झोलमा डुबेर मरि' भन्ने उखान नायिका संचिता लुइटेल र निरुता सिँहमा लागू हुन्छ । कुनै समय निरुताविना फिल्म नै बन्दैनथे । नयाँले विस्थापित गरेपछि निरुता बलिउड छिर्ने उद्देश्यसाथ नेपाल छाडिन् । इन्टेरियर डिजाइनिङ पढेर बलिउड छिर्ने उनको उद्देश्य पनि अन्तत सफल भएन । निरुता इन्टेरियर डिजाइनिङमा पनि राम्रो गर्न नसकेपछि अहिले आपतमा छिन् । संचिता पनि यसो भन्छिन् 'अब सिनेमामा लाग्दिन होला' । बलिउड प्रवेशको उनको उद्देश्य यति सजिलै सफल हुने छाँट पनि देखिँदैन । 'दागु', 'बन्दी' लगायतका उनले खेलेका पछिल्ला केही सिनेमाहरु पनि लगालग फ्लप भए ।हुन त उषा पौडेल पनि नेपाली सिनेमामा नयाँ अनुहार नै हुन् । महाकवि देवकोटाको कृति मुनामदनमा 'मुना'को भूमिकाबाट केही ट्याग भिरेकी उषा पौडेलको अभिनयले बक्स अफिसमा कमाल गर्न सकेन । त्यसैले निर्माताहरु उनलाई प्रमुख भूमिकामा राख्न चाख पनि देखाउँदैनन् । उषा पनि बलिउडको स्वाद चाख्ने उद्देश्यले उतै अभिनय सिकिरहेको बताउँछिन् । यसैगरी झरना बज्राचार्यका एकाधबाहेक सबै सिनेमा फ्लप भए । अनि उनलाई कुन निर्माताले लिइदिने? दर्शकले नै मन नपराएपछि । झरनाको अवस्था त अघोषित सन्यास नै लिएको जस्तो भैसक्यो ।यी पुरानालाई छेउ लाएर नम्राता श्रेष्ठ, कर्म, आर्यन सिग्देल, केकी अधिकारी, बेनिशा हमाल,जीवन लुइटेल, राजबल्लभ कोइराला जस्ता अनुहार पर्दामा लगालग देखिन थालेका छन् । पुराना अनुहार विस्थापित भएर नयाँले ठाउँ पाउने भनेको आफैँमा राम्रो पक्ष त हो । तर पुरानाहरु यहाँबाट विरक्तिएको कारणको अनुसन्धान हुनु जरुरी छ । किनकि आजका नयाँ अनुहार पनि भोलि उसैगरी हराए भने सिनेमा उद्योगको अस्तित्वमाथि नै संकट आइपर्ने निश्चित छ ।पुरानाले नयाँलाई विस्थापित गर्नु परेको कारणहरु विविध हुन सक्छन् । दर्शकले चाहेअनुसारको भूमिका परिवर्तन गर्न नसक्ने चाहिँ प्रमुख कारण हुन सक्छ । यसैगरी नयाँ पुस्ताका अभिनेता तथा अभिनेतृहरु सिनेमाको गहिरो अध्ययन पश्चात् यो क्षेत्रमा हाम फालेकाले पनि उनीहरु यो क्षेत्रमा स्थापित हुन थालेका हुन् ।

Read More

तथ्य एउटा कुरा अर्कै

निर्माता संघका कार्यकारी सदस्य जयप्रकाश रिजालको एउटा आरोप छ, 'निर्माताहरु आफैँ होल्डओभर कायम गर्छन् अनि आफैँ टिकट किनेर सिनेमा हप्तौँ चलेको प्रचारवाजी गर्छन् ।' यो आरोपलाई डिसिएनका दिपक दंगालले प्रतिकृया दिन मान्दैनन् ।
'त्यो प्रचारवाजी गर्ने काम निर्माताहरुको हो । हामीले फिल्म वितरण गर्ने हो । हामीले बजारमा पठाएका फिल्महरुले राम्रै व्यापार गरिरहेका छन् ।' बक्स अफिसको रेकर्डअनुसार 'दशगजा', 'प्रहार' 'निगरानी' जस्ता फिल्महरुले औषत व्यापार गरे । डिसिएनले वितरण गरेको अहिलेका केही चलचित्र 'निगरानी' 'प्रहार' र 'दशगजा' हुन् । 'दशगजा'ले चालिस लाख ग्रस बटुलेको छ, 'प्रहारले' एक करोँड रुपैँया ग्रस बटुलेको देखिन्छ । त्यसैगरी 'निगरानी'ले त्रिपन्न लाख रुपैँया ग्रस बटुलेको तथ्यांक छ, जुन औषत भन्दा मुनि छ । दंगालले दावी गरेअनुसार निगरानीले 'राम्रो' व्यापार गर्‍यो । तर बक्स अफिस रेकर्ड हेर्दा भने उसको स्तर औषत भन्दा मुनी रह्यो । मेरोसिनेमालाई बताइएअनुसार डिसिएनले वितरण गरेका सिनेमाहरुको कमाइबाट निर्माताहरु खुसी छन् । तर यो विश्लेषणलाई ख्याल गर्दा अवस्था भने अर्कै देखिन्छ । यसप्रकार तथ्यांक एकातिर र निर्माता, विश्लेषक र वितरकहरुको कुरा अर्कै देखिन्छ । नेपाली सिनेमाले यो स्तरबाट छुट्कारा पाए स्थितिमा केही सुधार आउने पक्का छ ।

Read More

राजेश भर्शेश राजेश !

कुनै पनि नेपाली सिनेमामा राजेशको अनुहार मात्रै देख्न पाए दर्शकहरुको भिड उर्लेर आउँछ । त्यसैले राजेश हमालको नेपाली सिनेउद्योगमा नाम मात्रै काफि छ ।'वीरताको चिनो', 'दशगजा', 'जयशिव शंकर' र 'साहसी' नामका चलचित्र यसै साताको शुक्रबार रिलिज हुँदै छन् । रिलिज हुने चारमध्ये 'दशगजा', 'जयशिव शंकर' र 'साहसी'मा राजेश आफैँ नै अभिनेताको रुपमा देखिँदै छन् । फर्मुला श्रेणीका तीन वटै सिनेमाबाट निर्माताहरु राजेशबाट अत्यधिक आशावादी छन् ।'जयशिव शंकर'मा राजेशबाहेक विराज र निखिल पनि छन् । विराज र निखिल कलिउडबाट पलायनको बाटोमा आफैँ डोरिँदै छन् भने राजेशचाहिँ दर्शकबीच सधैँको सुपरस्टार ! यो सिनेमाको कथावस्तु त परम्परागत एक्सनको श्रेणीमा नै छ । त्यसैगरी 'दशगजा' नेपालको जल्दोबल्दो सीमा समस्यामा केन्द्रीत छ । दयाराम दाहालले निर्देशन गरेको यो सिनेमा नेपाल-भारतबीचको सीमा समस्या र यसबाट जनताहरुले झेलिरहेका दुख्ख देखाउने प्रयासमा छ । यसैगरी 'साहसी'मा राजेश चिनियाँ शास्त्रिय युद्धकलाको ताइची गुरुको रुपमा देखिएका छन् । वास्तविक जीवनमा ताइची गुरु रहेका भोज गुरुङले चलचित्रमा भने राजेशको चेला बनेर देखिँदै छन् । वासुदेव पोखरेलले यस सिनेमालाई निर्देशन गरेका हुन् ।यी तीनवटै सिनेमामा राजेश हमाल आफूसँग आफैँले प्रतिस्पर्धा गर्दै छन् । सबैमा उनको भूमिकाको कसी भने एउटै छ- एक्सन हिरोको रुपमा । हमालले आफ्नो एउटा सिनेमासँग बाँकि दुइओटाले प्रतिस्पर्धा गर्नुपर्ने भएको छ । यसले हमाललाई त केही हानी नोक्सानी नहोला (किनकि उनी कलिउडका जहिल्यैका सुपरस्टार हुन्) तर दर्शक बाँडिने हुँदा यसको प्रत्यक्ष असर भने कलेक्स्न पनि बाँडिएर निर्मातालाई हुने पक्का छ । पहिलेदेखि स्थापित अरु अभिनेताहरु कोही बलिउड स्टार बन्ने सपना देखेर त कोही भोजपुरी सिनेमामा आकर्षित भएर पलायन हुने तर्खरमा रहेका बेला राजेश हमाल कलिउडमा आफैँसँग प्रतिस्पर्धा गर्नुपर्ने स्थिति आइपरेको छ ।

Read More

रेखा किन भइन् थकित ?

दर्जनौं चलचित्र सजिलै पस्केकी हिरोइन रेखा थापालाई यतिबेला भने आफ्नो होमप्रोजेक्टले हम्मे-हम्मे पारिरहेको छ । बन्जी जम्प, डाइभिङ, झरनाबाट हामफाल्ने, फाइटजस्ता जोखिम र साहसीपूर्ण सट् दिएकी रेखालाई पछिल्लो घरेलु प्रोजेक्ट 'अन्दाज'ले भने दुःख दिइरहेको छ । संवाददातासँग गफिँदा उनी थकित र सुस्केरा काढिरहेको मुडमा थिइन् । 'निकै गाह्रो भैरहेको छ' भन्छिन् 'एकैसाथ तीन चरित्र निर्वाह गर्नका लागि मिहेनत त गरिरहेकी छु तर सजिलो भने लागिरहेको छैन ।'रेखाजस्ती साहसी अभिनेत्रीलाई दुःख दिने ती तीन चरित्र कस्ता-कस्ता छन् ? अहिल्यै सार्वजनिक गर्ने पक्षँमा भने छैनन् उनी । 'एउटै कथाले मलाई तीन भूमिकामा देखाउँछु' रेखा भन्छिन् 'कथाको अवस्थाअनुसार एउटी साधारण छुच्ची र बोल्ड युवती । अहिलेलाई यतिमात्रै ।' प्रेमकथामा आधारित चलचित्रको निर्देशन गरिरहेका छन् निर्माता समेत रहेका उज्वल घिमिरे । रेखाको मिहेनत यसअघि कहिल्यै नदेखेको बताउँछन् उनी ।'अन्दाजमा उनी पर्फेक्ट अभिनेत्री दरिएकी छिन्' घिमिरे भन्छन् ।रेखा पहिलोपटक बहुमुखी चरित्रमा अभिनय गर्दैछिन् । त्यसमाथि पनि होमप्रोडक्सनको प्रोजेक्ट । आफ्नो भनेपछि मिहेनत त गर्नैपर्‍यो नि ।चलकेटी हिरो जीवन लुइँटेल रेखासँग अनस्क्रिन रोमान्स गरिरहेका छन् ।'फस्टलभ' अभिनेता सविन श्रेष्ठ हिरोका रुपमा पहिलोपटक 'अन्दाज'मार्फत आउँदैछन् । छवि ओझा, निर्देशक घिमिरे र अशोक शर्माको त्रिपक्षीय लगानीमा निर्माण भैरहेको सिनेमाको छायांकन जोमसोम लगायतका स्थानमा गरिनेछ । 'अन्दाज'पछि रेखा श्याम भट्टराईको प्रोजेक्ट 'लङ्का'मा देखिँदैछिन् ।

Read More

गायक राजु लामासँग पूजाले दोस्रो बिहे गर्ने

नायिका पूजा चन्दले दोस्रो बिबाह गर्ने भएकी छिन् । लामो समय देखि अमेरिका बस्दै आएकी पूजाले द एन्जेल्स ब्यान्डका गिटारिस्ट तथा गायक राजु लामासँग बिबाह गर्न लागेकी हुन् । नायिका पूजा र गायक राजुले अगस्ट महिनामा बिहे गर्ने भनि शुक्रबार इङगेजमेन्ट गरेका छन् ।पूजाकी आमा, छोरी, नातेदार तथा राजुका बाबु र नातेदारको साथमा केहि कलाकारहरूको जमघटमा उनीहरूले औंठी साटासाट गरेर इङगेजमेन्ट गरेका हुन् । २०४९ सालमा पति सुरज चन्दसंग भागी बिवाह गरेकी पूजा सुरजसँगको सम्बन्ध बिच्छेद पछि १२ बर्षको चलचित्र करिअरलाई बीचमै रोकेर २००५ मा अमेरिका प्रस्थान गरेकी हुन् । अठार बर्षिया छोरीकी आमा समेत रहेकी पूजा अहिले बाल्टिमोरमा छोरी दिब्यासँगै बस्दै आएकी छिन् भने उनका पहिलो श्रीमान् नेपालमै छन् र चलचित्रको निर्देशनको तयारीमा छन् ।झण्डै ३६वटा चलचित्रमा अभिनय गरिसकेकी नायिका पूजाले केहि महिना अगाडी नेपाल भ्रमणको क्रममा फिल्मीखबरसँग भने जस्तो केटा पाए आफू अर्को बिवाह गर्न तयार रहेको बताएकी थिईन् । उनले भनेकी थिइन्, 'बिवाह गर्ने सोच भएपनि भने जस्तो केटा पाएको छैन ।'पूजालाई फिल्मीखबरले कस्तो केटा चाहिएको छ त भनि प्रश्न गर्दा उनले भनेकी थिईन्, 'माया गर्ने र केयरिङ्ग गर्ने ।' पूजाले फिल्मीखबरसँग गरेको कुरा आज यथार्थमा परिणत भएको छ अर्थात उनले आफूलाई निकै माया गर्ने र केयरिङ गर्ने असल जीवनसाथी पाएकी छिन् ।अब कुरा आउँछ उनकी छोरीको । आफ्नै छोरीको भबिष्य राम्रो होस् भनेर अमेरिका हानिएकी पूजाले अब भने छोरीलाई कहाँ छोड्लिन् त ? आफ्नी अठार बर्षिया छोरीलाई पूजाले साथमै लान्छिन् या अरू कुनै बिकल्पको बाटो खोज्छिन् भन्ने प्रश्न सबैको मन मष्तिस्कमा नउब्जेला भन्न सकिन्न । आफ्नी छोरीको टेन्सन त पूजालाई होला नै तर पनि दोस्रो पति पाएकोमा नायिका पूजालाई बधाई तथा नयाँ दाम्पत्य जीवनको शुभकामना !

Read More

अन्जु पन्तले गरिन डिभोर्स

सम्बन्ध बिच्छेदको हल्ला चलिरहँदा गायिका अन्जु पन्त र पति मनोज सेवाले झन्डै आधादर्जन भन्दा बढी कन्सर्टमा एकसाथ स्वर दिए । कन्सर्टका लागि सँगै पूर्वी र मध्य नेपालको दौडाहामा पनि निस्किए । एकसाथ देखिन थालेपछि यी गायक दम्पत्ती फेरी एक हुन थालेका गाइँगुइहरु पनि सुनिए । तर मंगलबार जापान उड्नुअघि अन्जुले मेरोसिनेमासँग कुरा गर्दै मनोजसँगको आफ्नो सम्बन्ध पति-पत्नीबाट अलग भएर व्यावसायिक मात्र भएको बताएकी छिन् ।उनका अनुसार दुवैजना एउटै कन्सर्टमा देखिनु रहर नभएर बाध्यता मात्र थियो । दुवैजना अलग हुनुअघि अन्जु र मनोजले ती कन्सर्ट र एक टेलिभिजनको सिङ्गल आइडल नामक रियालिटी सोमा सहमति गरिसकेका थिए । सहमतिलाई निरन्तरता दिन दुवैजना एकसाथ देखापरेका हुन् । 'अब हामी दम्पत्तीको रुपमा रहेनौं' नेपाली सिनेमाकी शीर्ष पाश्र्वगायिकाले भनिन् 'ऊ र मबीच व्यावसायिक सम्बन्ध मात्र कायम छ । म गायिका र ऊ गायक ।'महिनादिनअघि एक ट्याब्लोइडले नम्बर वान गायिकाको वैवाहिक जीवनबारे समाचार छापेको थियो । दुइबीच प्रतिष्ठा र असमझदारीले झगडा भएको र छुट्टिएर बस्न थालेको समाचारमा उल्लेख थियो । मनोजसँगको दाम्पत्यबाट अन्जुसँग एक छोरा छन् । लामो समयदेखि उनी माइतीमा रहँदै आएकी छिन् । हाँस्यअभिनेता गोपाल नेपालसँग जापान उडेकी अन्जुले त्यहाँका सुनामी पीडितहरुलाई सहयोग गर्ने भएकी छिन् । दुबैबीचको डिभोस्रलाई लिएर यतिबेला नेपाली सिनेमा र गायन क्षँत्र तातेको छ ।

Read More

रोपाइँपछि ‘किसान'

काठमाडौं, वैशाख १९ (नागरिक) -माओवादी सशस्त्र द्वन्द्वको विषयमा ‘जनयुद्ध' नामक फिल्म बनाएका विमल पौडेल किसानका कथालाई पर्दामा उतार्न व्यस्त छन्। उनको निर्देशन रहेको फिल्म ‘किसान'को अहिले पार्श्व संगीतको काम भइरहेको छ।‘यो काम तीन दिनमा सकिन्छ। मिक्सिङको लागि एक हप्ता लाग्ला,' उनले भने,‘कलर करेक्सन गर्न मुम्बई जाने तयारी भइरहेको छ। त्यतिबेला यहाँ ५.१ सराउन्डिङ साउन्डको काम हुन्छ।' करिब एक महिनामा फिल्मको सबै काम पूरा गर्ने उनको योजना छ।‘किसान'को रिलिज भने किसानलाई फुर्सद मिलेपछि मात्र गर्ने उनले जानकारी दिए। ‘यसो उसो गर्दा जेठ सकिहाल्छ। असार र साउन त मानु रोपेर मुरी फलाउने समय हो,'भदौमा फिल्म रिलिज गर्ने विषयमा उनी वितरकसँग कुरा छिन्दैछन्।सार्वजनिक प्रदर्शनअघि च्यारिटी शो र विदेशमा फिल्म देखाउने प्रयास भइरहेको छ। फिल्म व्यापारमा आएको मन्दीले तुरुन्त रिलिज गर्ने मुडमा नदेखिएका हुन् उनी।‘अहिलेको व्यापारिक नतिजाले पनि निराश बनाएको छ। च्यारिटी र विदेशबाट केही पैसा उठाउन सकिन्छ कि भन्ने विश्वास छ'उनले नागरिकलाई बताए।देश विकासमा किसानको भूमिका कस्तो हुनुपर्छ भन्ने कथा उनले फिल्ममा चित्रण गरेका छन्।‘जनयुद्ध'मा माओवादी कमान्डरलाई हिरो बनाएका विमलको यो फिल्मको निायक पात्र किसान रहेको छ। माओवादी निकट फिल्मकर्मी पौडेलले यो फिल्म राजनीतिक रंगबाट मुक्त रहेको प्रष्ट पारे।‘सामुदायिक कृषि प्रणालीको महरूव देखाउन खोजेको छु। मध्यस्थकर्ताले नठगे उनीहरूको आम्दानीले शिक्षा र स्वास्थ्यमा पुग्ने योगदानको चर्चा गरेको छु,' उनले दाबी गरे।
फिल्ममा राजेश हमाल, नीर शाह, राहुल केसी, गणेश भण्डारी, मौसमी मल्ल र नन्दिता केसीले अभिनय गरेका छन्।

Read More

रेजिनालाई भ्याइनभ्याई

काठमाडौं, वैशाख १८ (नागरिक) - अभिनेत्रीबाट निर्मात्री बनेकी रेजिना उप्रेतीलाई आजकाल भ्याइनभ्याइ भएको छ। अभिनयमा मात्र ध्यान दिए पुग्ने रेजिनालाई फिल्मका सबै पक्षको जिम्मेवारी लिनु परेको छ।यातायातदेखि खानपिनको व्यवस्थामा खुब खटेको भेटिन्छ उनलाई। ‘अरुको फिल्म खेल्दा वास्तै गर्नु नपार्ने काममा अहिले मेरो सबैभन्दा धेरै चासो छ। लोकेसन छनोट र मौसमको समेत जानकारी समेत राख्नु परेको छ,' रेजिनाले भनिन्।‘वरदान' नामक फिल्म निमार्ण गरिरहेकी रेजिनाको वर्षमा एउटा फिल्म बनाउने योजना छ। ‘यो क्षेत्रमा लागेको झन्डै १० वर्ष भयो। व्यापारमा पनि हाल हालुँ भनेर फिल्म निर्माणलाई रोजेकी हुँ,' फिल्म निर्देशनमा भने अहिले लाग्ने सोच नरहेको उनले बताइन्।फिल्मको करिव १५ प्रतिशत सुटिङ सकिएको जानकारी दिंदै उनले नागरिकसँग भनिन्,'लगानी गरेपनि निर्देशकलाई स्वतन्त्र रुपमा काम गर्न दिएको छु। तैपनि मेरो भूमिका निकै राम्रो छ।' केही दिनमै सुटिङ गर्न काठमाडौंबाट पोखरा र जोमसोम जाने उनको तयारी छ।‘वरदान'मा फिल्ममा राजेश हमाल, करिश्मा मानन्धर, मुकेश ढकाल र अर्जुन कार्कीले अभिनय गरेका छन्। शोभित बस्नेत फिल्मका निर्देशक हुन्।

Read More