भुनिया अब नायीका

चर्चित हास्य टेलिश्रृखला मेरीबास्यैमा भुनियाको चरित्रमा अभिनय गरेर चर्चा कमाएकी कलाकार हरिशा बानिया भोजपुरी चलचित्रमा नायीकाका रुपमा देख्न पाइने भएको छ । उनले नायीकाका रुपमा अभिनय सुरु गरेको भोजपुरी चलचित्र बौछार को आइतबार सुनसरीको झुम्कामा शुभमुहुर्त गरिएको छ । नायक श्याम कटुवाल, खलनायक मुन्ना अन्सारी रहेको सो चलचित्र पश्चिमि नेपालमा रहेको कमैयाप्रथालाई विषय बस्तु बनाइएको छ ।

करिव तीन दर्जन टेलिचलचित्र र केहि नेपाली चलचित्रमा अभिनय गरिसकेकी नायीका हरिशाले आफ्नो रुचि भोजपुरी भाषामा भएकाले आफ्नो अभिनयमा जिवन्तता प्रस्तुत गर्न बताइन् । मेरिबास्यैमा भोजपुरी भाषाको चरित्र भएकी भुनियाको अभिनय गरेकी हरिशाले भनिन्, 'मैले पहिले पनि भोजपुरी भाषाको चरित्रमा अभिनय गरिसकेकी छु । भोजपुरी भाषा प्रतिको रुचिकै कारण म २०६५ मा भोजपुरी नृत्यमा पूर्वाञ्चल टप पनि भएकी थिएँ । त्यसैले पनि मैले यो चरित्रलाई न्याय गर्न सक्छु जस्तो लागेको छ ।'नायक श्याम कटुवाल पनि पहिलो पटक भोजपुरी भाषाको चलचित्रमा नायकको भुमिका निभाउँदैछन् । केहि नेपाली चलचित्रमा अभिनय गरिसकेका कटुवाललाई भने भोजपुरी भाषाको चलचित्रमा अभिनय गर्दा फरक अनुभव हुने ठहर छ । उनि भन्छन्, 'भाषामा समस्या भए पनि अभिनय त उस्तै हो नी । भाषाले गर्दा अभिनयमा पनि केहि फरक पन त पक्कै आउँछ ।'

मोरङ र सुनसरीका विभिन्न ठाउँमा छायाङ्कन गरिने चलचित्रमा स्थानिय कलाकारको बाहुल्यता रहेको निर्देशक शिव ओम अधिकारीले बताए । उनले पश्चमी नेपालका तराइसंग मोरङ र सुनसरीको भौगोलिक अवस्था मिल्ने भएकाले छायाङ्कन गरिएको बताए । अधिकारीले नेपाली चलचित्र भन्दा भोजपुरी चलचित्रकॊ बजार ठुलो भएकाले पुर्ण ब्यवसायीक चलचित्रको निमार्ण थालेको बताए । उनले भोजपुरी चलचित्रको ठुलो बजार भारतमा रहेको बताए । ३० दिनमा छायाङ्कन सकेर दशै तिहारको विचका चलचित्र प्रर्दशनमा ल्याउने उनको भनाइ थियो ।