आशिर्वाद माग्दै शोभित

फिल्म रिलिज अघि वा पछि निर्माता/निर्देशक शक्तिपीठ धाउने ट्रेन्ड नयाँ होइन । निर्देशक आलोक नेम्वाङ आफू निर्देशित दोस्रो फिल्म रिलिज अघि तीनवटा महत्वपूर्ण शक्तिपीठ पुगेर पूजा गरे । अहिले त्यही ट्रेन्डलाई पछ्याएका छन् निर्माता/निर्देशक शोभित बस्नेतले । अपेक्षाकृत राम्रो ब्यापार नगरिरहेको चलचित्र 'कन्यादान'का निर्माता समेत रहेका शोभित सोमबार विहानै वितरक कृष्ण कार्कीलाई लिएर गोरखाको शक्तिपीठ मनकामना हानिएका थिए ।

केवुलकार चढेर मनकामना पुगेका शोभितले के आशिर्वाद मागे त्यो त उनैले जानुन तर, कन्यादान सफल भएपछि मनकामना आएको दावी उनको थियो । तर, त्यो सफलताको आधार उनले खुलाएनन् । 'कन्यादान सफल भएपनि आउने अठोट पहिल्यैदेखि थियो र आएको हुँ' शोभित भन्छन् 'व्यवसायिक सफलताको आशिर्वाद पनि मागें ।' कन्यादान 'सफलता'को पछाडि मनकामनाको हात रहेको दावी उनको थियो । शोभितको होम प्रोडक्सनको अर्को फिल्म 'चिनो' पुस २९ मा रिलिज हुँदैछ भने अर्को फिल्म 'राज'ले पनि रिलिजको मिति कुरेर बसिरहेको छ ।