माल्भिकालाई सेनाले पछ्यायो!

स्मृति ढुंगाना, काठमाडौं, चैत १३- चोभार डाँडाको घुम्तीमा पूर्व मिस नेपाल माल्भिका सुब्बा कार हाँकिरहेकी छिन्। उनको पछिपछि सेनाका दुई ठूला ट्रक पनि गुडिरहेका छन्। एकैछिनमा सेनाको ट्रकले माल्भिकाको कारलाई ओभरटेक गर्छ। कारमा माल्भिका एक्लै छैनन्। फिल्म निर्देशक नवीन सुब्बा, अभिनेता सुवर्ण थापा र फ्रान्सेली क्यामेराम्यान टेरी टाइब पनि छन्। निर्देशक सुब्बा घरीघरी आर्मीको गाडीलाई इसारा दिँदछन्। कारको बायाँ लुकिङ ग्लासबाट माल्भिका पनि आर्मीको ट्रक नियाल्दै छिन्। उनको बेलाबेला सुवर्णसँग वार्तालाप चल्दैछ। त्यो वार्तालाई क्यामेरामा कैद गर्दैछन् क्यामेराम्यान टेरी। चोभारमा बिहीबार भएको 'गुडबाई काठमाडौं'को अन्तिम सुटिङमा यो दृश्य देखिएको हो। फिल्मका चार मूख्य चरित्रमध्येकी एक मायाको भूमिकामा देखिएकी छिन् माल्भिका। फिल्ममा उनी साधारण मानवअधिकारीकर्मी बनेकी छिन्। संगीतमा रुचि राख्ने माया र अमरबीच राम्रो मित्रता हुन्छ। सेनाले ओभरटेक गरेको यो दृश्य निर्देशक सुब्बाले प्रतीकात्मक रूपमा राखेका हुन्।फिल्ममा अमर शर्मा (सुवर्ण थापा), मंगल बज्राचार्य (कर्म शाक्य) र रविन गुरूङ (निखिल गुरूङ)को मूख्य भूमिका छ। संकटकालको घटनाक्रमलाई फिल्ममा उतारिँदै छ। जम्मा चार महिनामात्र सुटिङ भए पनि एक वर्षको अवधि लागेको छ। 'कर्म दुर्घटनामा परेकोले र चिसो माहोल चाहिने भएकोले सुटिङ लम्बिएको हो,' सुब्बाले बताए।विभिन्न परिस्थितिका कारण विदेशिन बाध्य युवाहरूको कथालाई फिल्मले समेट्ने प्रयास गरेको छ। 'विभिन्न परिवेशमा संघर्ष गरिरहेका मध्ये तीन युवाको कथा समेटेको छु,' निर्देशक सुब्बाले भने। यसअघि अन्तर्राष्ट्रिय फिल्म 'गड लिभ्स इन द हिमालय'मा अभिनय गरिसकेकी माल्भिकाले 'गुडबाई काठमाडौं'कै लागि १५ दिने कार प्रशिक्षण समेत लिएकी थिइन्। 'औपचारिक रूपमा मेरो पहिलो नेपाली फिल्म हो यो,' माल्भिकाले भनिन्। फिल्म सुरु गर्नुअघि उनले मानवअधिकार सस्थासँग आवद्ध महिलाहरूसँग अन्तर्त्रि्कया गरेकी थिइन्। 'काठमाडौंकी आधुनिक युवती भूमिका भएकोले मैले आफ्नो लुक्समा केही परिवर्तन गरेकी छु,' उनले भनिन्। अधिकांश फिल्मको सुटिङ अप्ठ्यारो भए पनि पाटनमा खिचिएको बम विस्फोटको दृश्य गर्नभने उनलाई गाह्रो लागेको थियो। 'फिल्मका काम गर्नुअघि स्त्रि्कप्ट राम्ररी पढ्छु। राम्रो लाग्यो भनेमात्र फिल्म गर्छु,'बताउने माल्भिका हाल केही अफर आए पनि तत्काल अभिनय नगर्ने सोचमा छिन्।यो कारको दृश्य खिच्न निकै अप्ठ्यारो लागेको निर्देशक सुब्बा बताउँछन्। 'ऐनामा मायाको भूमिकालाई रिफ्लेक्ट गर्नुपर्ने हुँदा कारभित्रको ऐनाको सटलाई महत्व दिएका छौं,' उनले भने। क्यामेम्यान टेरीलाई उनी देवता नै मान्छिन्।'हरेक सट लिनुअघि कारण सोध्छन्। धेरै जिज्ञासु भएकै कारण उनको काम उत्कृष्ट भएको हो,'सुब्बाले थपे। फिल्मलाई भदौमा रिलिज गर्ने योजना उनको छ।