अरु बिलाए, म जम्नेछु

म यस्तो थिइँन्, कस्तो भएछु ।
सायद तिम्रो रुपमा म मोहित भएछु ।।
माथिका हरफहरु चर्चित हास्य अभिनेता हरिवंश आचार्यका छोरा मोहितवंश आचार्यद्धारा गाईएको एक गीतको हो । गीतमा कसैको रुपमा मोहित भएका मोहित अचेल नेपाली सिनेमा क्षेत्रतिर मोहित भएका छन् । त्यसैले त उनी गोपीकृष्ण मुभिजको ब्यानरमा बन्न लागेको सिनेमा 'मायाको बारीमा' नायकको रुपमा पदार्पण हुने सुरमा छन् । अघिल्ला समयहरुमा धेरै गायकहरु नायक नबनेका होईनन् तर ति सबैले नेपाली सिनेमा क्षेत्रमा आफ्नो स्थान लामो समयसम्म सुरक्षित राख्न सकेनन् ।अब मोहित भने त्यो इतिहास दोहोर्याउने पक्षमा छैनन् । उनी भन्छन्, 'अरु बिलाए, म जम्नेछु' ।नायिका केकी अधिकारीसँग रिल रोमान्स गर्न लागेका मोहितले थुप्रै टेलिश्रंखलाहरुमा पनि अभिनय गरिसकेका छन् । केहि समयअघि प्रदर्शनमा आएको शिव रेग्मी निर्देशित सिनेमा 'हाँसिदेऊ एकफेर'मा 'साउन भदौ'मा बोलको गीत गाएका मोहित गोपीकृष्णको ब्यानरबाट नेपाली सिनेमा क्षेत्रमा डेब्यु हुन पाउँदा खुशी छन् । 'म बर्षमै १२, १३ वटा फिल्म खेल्दिँन, छानेर खेल्छु', उनले भने, 'अरु गायकहरु कोही रहरले यो क्षेत्रमा लागेका थिए होलान् तर म रहरले लागेको होईन्' ।स्मरण रहोस्, केहि समयअघि गायक यश कुमार 'बाटो मुनिको फुल'बाट नायकको रुपमा नेपाली सिनेमा क्षेत्रमा पदार्पण भएका थिए भने केहि समय पश्यात् अर्का नायक सत्यराज आचार्य सिनेमा 'आचार्य'मा नायकको भुमिकामा देखिदै छन् ।