गीतको पछाडि दौडिनेहरु

'नाई नभन्नु ल' का निर्देशक बिकास आचार्यले यस सिनेमाको नाम बेग्लै ढंगले पत्ता लगाए । आफु निर्देशित पहिलो सिनेमा 'न शिव आफ्नो'को एक गीतबाट उनले यो नाम समातेका हुन् । त्यसो त आगामी प्रोजेक्ट 'म तिम्रै भैसकें'को न्वारनको कथा पनि उस्तै छ । 'नाई नभन्नु ल'कै शिर्ष गीतमा यी शब्दहरु छरपस्टै छन् ।यता, निर्माता रिमेश अधिकारी पनि गीतको पछाडि दौडने मध्येमै पर्छन् । उनले आफ्नो अघिल्लो सिनेमा 'वशमा छैन यो मन'को न्वारन राजन इशानको 'वशमा छैन मेरो मन' बोलको गीतलाई अलिकति बँग्याएर गरिएको पाईन्थ्यो । हाल आएर अर्को सिनेमा 'म बिर्सुं' कसरीको नाम पनि त्यहि शिद्धान्तमा निर्भर भई जन्माएका छन् । यी शब्दहरु हामी स्वर सम्राट नारायण गोपालको 'यो सम्झिने मन छ' बोलको लोकप्रिय गितमा भेट्न सक्छौं ।त्यस्तै, गोपीकृष्ण मुभिजको निर्माणमा बनेको सिनेमा 'प्रितिको फुल'को नाम कसरी रह्यो भनेर त भन्नै नपर्ला । एक दशकअघिको सफल सिनेमा 'कुसुमे रुमाल'को शिर्षगीत 'मायाको बारीमा प्रितिको फुलबाट' यो नाम जन्माईएको हो । यो गीतका शब्दहरुलाई निर्माता उद्धव पौडेल अझै छोड्ने पक्षमा छैनन्, त्यसैले त उनले आफ्नो आगामी प्रोजेक्टको नाम 'मायाको बारीमा' राखेका छन् नि । फरक यति मात्र हो कि, गीतमा 'मायाको बारीमा' पछि 'प्रितिको फुल' आउँथ्यो भने सिनेमा बन्दा 'प्रितिको फुल'ले जित्यो । अब यसपछिको शब्द 'सँगाली राखेको' नामबाट पनि अर्को सिनेमा नबन्ला भन्न सकिन्न, त्यसपछिको शब्द 'कुसुमे रुमाल'बाट त दुई वटै सिनेमा बनिसक्यो ।यसरी गीतको पछाडि दौडिनेहरुको नाम खोज्दै जाने हो भने त एउटा 'महाभारत' नै तयार हुनसक्छ । त्यसैले यो खोजीलाई यहिँ रोकौं ।