कति बज्यो अहिले? कसैले यस्तो प्रश्न सोध्दा वा आफैलाई जिज्ञासा जाग्दा तपाइँले नाडीमा बाँधेको घडी हेर्नुको साटो गोजीमा भएको मोबाइल हेर्न थाल्नुभएको कति भयो?
पक्कै पनि धेरै नै भइसक्यो। हुनत अहिले पनि नाडी घडी बाँध्नेहरु पूरै हराइसकेको अवस्था हैन। तर उनीहरुले पनि मान्नै पर्छ कि नाडी घडीको स्थान अब स्मार्ट फोनहरुले लिइसकेको छ। यस्तो अवस्थामा आफ्नो पुरानो विरासत थाम्नको लागि घडीले केही अर्को रुप लिनसक्छ त? स्मार्ट फोनलाई चुनौति दिन स्मार्ट घडीको अवधारणा कस्तो होला?एउटा त्यस्तो घडी, जसले समय मात्र हैन, स्मार्ट फोनका अधिकांश काम पनि गर्न सकोस्। इमेल पढ्न सकोस्, टि्वटर वा फेसबुकका स्टायटस हेर्न सकोस्। जुन घडी पुरातन घडी जस्तो सँधै मान्छेको नाडीमा बाँधियोस्।यस्तो कल्पना धेरै अघिदेखि हुन थालेको हो। कल्पना रमाइलो छ। र त, पेब्बल नामको कम्पनीले लौ न हामी यस्तो बनाउँदैछौँ, हामीलाई सहयोग गर्नुपर्यो भनी इन्टरनेटको किकस्टार्टरमा चन्दा अभियान चलाउँदा एकै दिनमा १० लाख डलर चन्दा उठ्यो।
